Karcina Van Hoha pradadziena z aŭkcyjonu za rekordnyja 190,4 miljona dalaraŭ
«Kaštany, što ćvituć» (Châtaigniers en fleurs) Vincenta Van Hoha byli pradadzienyja ŭ sieradu na aŭkcyjonie Sotheby's u Ńju-Jorku.

Heta druhi pavodle koštu tvor mastactva ŭ historyi aŭkcyjonaŭ Sotheby's: rekord naležyć «Partretu Elizabet Lederer» Hustava Klimta, jaki byŭ nabyty hod tamu za 236,4 młn dalaraŭ, piša Bi-bi-si.
Samaj darahoj karcinaj Van Hoha dahetul było «Pšaničnaje pole z kiparysam» — jana była pradadzienaja ŭ 2022 hodzie za 117,2 młn dalaraŭ.
Siarod usich najdaražejšych tvoraŭ mastactva, kali-niebudź aficyjna pradadzienych z aŭkcyjonaŭ ci pryvatnym čynam, «Kaštany» zaniali dziaviataje miesca.
Pieršaje — za «Zbaŭcam śvietu», aŭtaram jakoha ličycca Leanarda da Vinčy i jaki byŭ pradadzieny rasijskim miljarderam Dźmitryjem Rybałoŭlevym u 2017 hodzie na aŭkcyjonie Christie's za 450 młn dalaraŭ.
Karcinu «Kaštany, što ćvituć» Vinsent Van Hoh napisaŭ u 1890 hodzie ŭ vioscy Avier-siur-Uaz niedaloka ad Paryža, dzie jon pravioŭ apošnija dva miesiacy žyćcia.
Hetaja karcina ŭvachodziła ŭ lik 12 vystaŭlenych na tarhi tvoraŭ sa znakamitaj Kalekcyi Błakje-Arjety — kalekcyi, sabranaj ciapier pamierłymi arhiencinskimi miecenatami Karłasam Błakje i jahonaj žonkaj Neli Arjetaj.
Pierad tarhami vystava z hetych 12 karcin była zładžanaja ŭ Łondanie, Paryžy, Tajbei, Hankonhu i Ńju-Jorku, i jaje naviedali amal 30 tysiač čałaviek.
Pry hetym aŭkcyjonny dom Sotheby's tolki za niekalki hadzin da tarhoŭ abviaściŭ, što prodaž «Kaštanaŭ, što ćvituć» usio ž taki moža adbycca, pakolki jon uładziŭ sprečku pamiž spadkajemcami Błakje i Arjety i spadkajemcami Samuela Fišera — niamieckaha jaŭreja, viadomaha vydaŭca, jaki vałodaŭ karcinaj u pieršaj pałovie XX stahodździa.
Juryst spadkajemcaŭ siamji Fišera zajaviŭ ad ich imia, što svajaki vydaŭca mahli być vymušanyja pradać karcinu z-za pieraśledu z boku nacystaŭ.
U liście aŭkcyjonnamu domu Sotheby's juryst, pavodle paviedamleńniaŭ presy, zajaviŭ, što spadkajemcy Fišera pradali karcinu ŭ 1936 hodzie ŭ Amsterdamie praz toje, što ich siamiejnaje vydaviectva pry nacystach paniesła ciažkija finansavyja straty.
Ale ŭ sieradu, pierad samymi tarhami, Sotheby's abviaściŭ: «Pryznajučy składany los karciny ŭ časy nacystaŭ i pakuty, pieraniesienyja siamjoj Fišeraŭ padčas Chałakostu, dźvie siamji pryjšli da ŭzajemazdavalniajučaha rašeńnia, i hetaja praca budzie pradadzienaja ŭ adpaviednaści ź ich pahadnieńniem».
Paśla 1936 hoda i da Błakje-Arjety ŭ «Kaštanaŭ» było jašče piać uładalnikaŭ. Błakje i Arjeta nabyli karcinu ŭ 1975 hodzie.
Kamientary