Amierykanski miljarder Iłan Mask zajaviŭ, što rasijskija vajskoŭcy zasłuhoŭvajuć bolšaha spačuvańnia, čym atrymlivajuć, bo mnohich ź ich, maŭlaŭ, adpraŭlajuć na front suprać ichniaj voli. Pra heta jon skazaŭ 18 listapada padčas intervju na mierapryjemstvie, arhanizavanym vydańniem The New York Times, piša Deutsche Welle.

«Treba spačuvać nie tolki ŭkrainskim chłopcam, jakija hinuć, ale i rasijanam, bo ich mabilizujuć i prymušajuć jechać na pieradavuju», — patłumačyŭ Mask svaju pazicyju.
Jon taksama raskrytykavaŭ supraćpastaŭleńnie «Ukraina — dobraja, Rasija — drennaja». Mask nazvaŭ žachlivym padychod, pry jakim možna apraŭdać usio, što robiać z rasijanami. Pry hetym jon pryznaŭ, što i sam sprabuje razabracca, jakaja pazicyja ŭ hetaj situacyi była b pravilnaj.
Kažučy pra rasijskaje ŭvarvańnie, Mask pryznaŭ, što Rasija źjaŭlajecca ahresaram. Adnak adnačasova jon zajaviŭ, što amierykancy, maŭlaŭ, arhanizavali pieravarot, kab adchilić ad ułady demakratyčna abranaha prarasijskaha prezidenta Ukrainy. Vierahodna, jon mieŭ na ŭvazie Jeŭramajdan i ŭcioki Viktara Janukoviča ŭ Rasiju ŭ 2014 hodzie.
«Hučyć tak, byccam ja šukaju apraŭdańnia Rasii, ale heta nie tak», — zapeŭniŭ Mask.
Varta adznačyć, što śćviardžeńnie, nibyta impieryjalistyčnaja palityka Kramla źjaŭlajecca vyklučna reakcyjaj na «dziaržaŭny pieravarot», jaki byccam by adbyŭsia ŭ Kijevie 2014 hodzie, źjaŭlajecca adnym z klučavych tezisaŭ, pakładzienych u padmurak rasijskaj dziaržaŭnaj prapahandy.
Kamientary