Bialacki: Na čarhovym schodzie «Viasny» składu ź siabie paŭnamoctvy
Pravaabaronca raskazaŭ, što ŭ nieŭzabavie źbirajecca pakinuć kiravańnie pravaabarončaj arhanizacyjaj, jakuju ŭznačalvaŭ 30 hadoŭ.

Paru tydniaŭ tamu nobieleŭski łaŭreat u intervju Deutsche Welle zajaviŭ, što źbirajecca pakinuć kiraŭnictva pravaabarončym centram «Viasna». Na krakaŭskim fiestyvali «Kultura ŭ vyhnańni» Biełaruskaja słužba Polskaha radyjo spytała ŭ pravaabaroncy, čamu jon vyrašyŭ pieradać kiraŭnictva «Viasnoj» i što mohuć zrabić dla Biełarusi tyja, kaho vymusili źjechać.
«Ja ž nie abviaščaŭ, što sychodžu z «Viasny». Ja jašče zastajusia staršynioj pravaabarončaha centra «Viasna», ale na čarhovym schodzie składu ź siabie paŭnamoctvy. Bolš za 30 hadoŭ ja ŭžo staršynia. I choć častku hetaha času ja pravioŭ u turmie i nie moh vykonvać staršynioŭskija abaviazki, maralnaja adkaznaść usio roŭna zastavałasia za mnoj.
Usiamu svoj čas. Vyrasła novaje pakaleńnie pravaabaroncaŭ. Heta maje najlepšyja siabry, ź jakimi ja pracavaŭ nie adzin hod. Jość dastatkova šmat daśviedčanych pravaabaroncaŭ, jakija zmohuć pavieści arhanizacyju dalej. A ja zastajusia ŭ «Viaśnie». Moža być, jak siabra rady, a moža, prosta jak siabra arhanizacyi. Heta ŭžo nie tak istotna», — skazaŭ Aleś Bialacki.
Jon kaža, što adčuvaje maralnuju adkaznaść za toje, kab arhanizacyja i dalej išła da stratehičnych met, jakija vyznačyli za hety čas, i praciahvała prahramy, jakija ciapier paśpiachova viadzie na karyść usioj Biełarusi i ŭsioj hramadzianskaj supolnaści.
«Nie tolki na karyść tych, chto źjechaŭ, ale i na karyść toj Biełarusi, jakaja ciapier u samoj Biełarusi. «Viasna» adyhryvaje ŭnikalnuju, važnuju rolu ŭ biełaruskaj hramadzianskaj supolnaści. Heta častka i biełaruskaha, i mižnarodnaha pravaabarončaha ruchu. Tamu ja z «Viasnoj», i «Viasna» sa mnoj. Inšaja sprava, što jak nobieleŭski łaŭreat ja ciapier pracuju nie tolki dziela Biełarusi i kłapačusia nie tolki pra jaje. Da mianie źviartajucca i kalehi-pravaabaroncy, i byłyja palitviaźni z usiaho śvietu. Ja sam byŭ palitviaźniem, tamu ciapier maju poŭnaje prava być hołasam palitviaźniaŭ usich tatalitarnych i aŭtarytarnych režymaŭ va ŭsim śviecie. Hetym i budu zajmacca najbližejšym časam.
Plus pytańnie miratvorčaści. Znoŭ ža, hetaje pytańnie šyrejšaje za Biełaruś. Što da vajny i teroru, jakija Rasija ciapier viadzie suprać Ukrainy, ja budu prykładać usie mahčymyja namahańni, kab ludzi nie stamlalisia ad hetaj situacyi i praciahvali supraciŭlacca aŭtarytaryzmu i tatalitaryzmu, jakija ciapier sprabujuć siłaj zbroi złamać Ukrainu.
Jašče adno pytańnie — salidarnaść hramadskich arhanizacyj, jak biełaruskich, tak i inšych demakratyčnych niaŭradavych arhanizacyj. Prablemy Biełarusi šmat u čym typovyja. Jany nie ŭnikalnyja, ja b skazaŭ. Toje samaje adbyvajecca ŭ Azierbajdžanie, u Rasii, u Kyrhyzstanie, u Hruzii. My bačym, jak u Hruzii pačali zhortvać demakratyčnyja pravy, jakich dabiŭsia hruzinski narod. Salidarnaściu ŭ supracivie tatalitaryzmu ŭ šyrejšym maštabie ja taksama budu ciapier vielmi aktyŭna zajmacca. Tamu što ja nobieleŭski łaŭreat i popyt ź mianie bolšy, čym sa zvyčajnaha čałavieka», — skazaŭ Aleś Bialacki.
Kamientary