U Varšavie ŭ kvateru biełaruski ŭvarvaŭsia ŭkrainiec, pavaliŭ na padłohu i zabraŭ darahuju sumačku
Były chłopiec dziaŭčyny vymahaŭ hrošy ŭ jaje novaha chłopca. A paśla razam ź siabram pajšoŭ na spravu.

Varšaŭskaja palicyja zatrymała dvuch hramadzian Ukrainy, 21 i 19 hadoŭ. Ich padazrajuć u razbojnym napadzie na 25‑hadovuju hramadzianku Biełarusi. Pavodle palicyi, starejšy ź ich — były chłopiec paciarpiełaj. Mienavita jon, jak miarkujuć śledčyja, padhavaryŭ małodšaha siabra napaści na žančynu, a sam u hety čas čakaŭ la ŭvachodu ŭ padjezd.
Niekalki dzion tamu biełaruska pryjšła ŭ kamiendaturu palicyi ŭ Varšavie. Jana raskazała, što ŭviečary viarnułasia ŭ svaju kvateru. Kali žančyna viešała kurtku, u kvateru zabieh nieznajomy mužčyna. Jon schapiŭ jaje za šyju, kinuŭ na padłohu i zapatrabavaŭ hrošy i kaštoŭnaści. Žančyna sprabavała ŭciačy, ale napadnik nie daŭ joj hetaha zrabić.
Mužčyna zabraŭ mabilny telefon koštam kala $380 i sumačku koštam kala $3300. Potym jon vybieh z domu, dzie jaho čakaŭ były chłopiec paciarpiełaj.
Palicyja taksama vyśvietliła, što abodva mužčyny praź miesiendžar pahražali ciapierašniamu chłopcu biełaruski i patrabavali ad jaho $20 tysiač.
Śledčyja vyličyli kvateru, dzie chavalisia padazravanyja. Mužčyny admovilisia adčyniać dźviery, tamu ich vyłamali pažarnyja, paśla čaho palicyja zatrymała abodvuch. U kvatery znajšli skradzienyja sumačku i telefon, a taksama niekalki dziasiatkaŭ porcyj marychuany.
Abodvum ukraincam abviaścili padazreńnie ŭ razboi, sprobie rabaŭnickaha vymahalnictva i zachoŭvańni značnaj kolkaści narkotykaŭ. Pa chadajnictvie prakuratury sud aryštavaŭ ich na try miesiacy. Im pahražaje da 15 hadoŭ pazbaŭleńnia voli.
Kamientary
Jakim dalokim treba być, kab u 21m stahodździ dumać, što za takuju bzduru možna zastacca biespakaranym?
huba nie dura, odnako