Usiaho patrochu11

Śpiavačka ź Biełarusi trapiła ŭ skandał u ZŠA. Vinavacić prafiesara Kałumbijskaha ŭniviersiteta ŭ zhvałtavańni, a jon jaje — u pieraśledzie siamji

Prafiesar biznes-škoły Kałumbijskaha ŭniviersiteta ŭ Ńju-Jorku Vaŭter Desejn i jaho studentka Eni Kierman byli kachankami. Ale kali jon vyrašyŭ viarnucca da žonki-kitajanki, pačałasia vajna nie na žyćcio, a na śmierć.

Vaŭter Desejn. Tut i dalej fota Daily Mail

52‑hadovy ekanamist Vaŭter Desejn, prafiesar biznes-škoły Kałumbijskaha ŭniviersiteta ŭ Ńju-Jorku, padaŭ u sud na 36‑hadovuju Eni Kierman. Ich raman praciahvaŭsia amal dva hady. Pavodle iska, kali prafiesar vyrašyŭ zastacca z žonkaj, Kierman pačała pahražać jamu, pieraśledavać jaho siamju i patrabavać hrošaj. Pra heta paviedamiŭ Daily Mail, jaki atrymaŭ kopii sudovych dakumientaŭ.

Desejn padaŭ isk u aŭtorak, 17 listapada, u sudzie akruhi Viestčester štata Ńju-Jork. Praź niekalki hadzin u tym ža sudzie zarehistravali isk ad ananimnaj pazoŭnicy pad imiem Jane Doe. Jana śćviardžaje, što ŭ studzieni 2026 hoda Desejn prymusiŭ jaje da seksu biez zhody. Abodva iski apisvajuć adzin i toj ža amal dvuchhadovy raman.

Chto jany

Desejn naradziŭsia ŭ Bielhii. U Kałumbijskim univiersitecie jon pracuje z 2008 hoda.

Pavodle materyjałaŭ spravy, Kierman karystajecca taksama imionami Arlo Legend Parker i Abi Lorrel. Pad imiem Abi Lorrel jana vystupaje ŭ Ńju-Jorku jak pop-śpiavačka.

Eni Kierman

Na svaim sajcie žančyna śćviardžaje, što naradziłasia ŭ Biełarusi, była tut dziciačaj zorkaj, a ŭ 16 hadoŭ atrymała premiju MTV jak najlepšaja novaja vykanaŭca.

Vierahodna, u Biełarusi jana vystupała pad imiem Annie K.Fernandez. U śniežni 2007 hoda «Muzykalnaja hazieta» pisała pra 17‑hadovuju R&B-śpiavačku z takim imiem. Jana pieramahła ŭ naminacyi «Debiut hoda» na Pre-Party MTV Russian Music Awards i chacieła ŭdzielničać u «Jeŭrafeście», biełaruskim adbory na «Jeŭrabačańnie», z ułasnaj pieśniaj «My real home». Ale praviły nie dapuskali ŭdzielnikaŭ, maładziejšych za 18 hadoŭ. Kiraŭnik prajekta Alaksandr Cichanovič tady kazaŭ, što, kab nie ŭzrost, śpiavačka trapiła b u paŭfinał, i nazyvaŭ takich artystaŭ «budučyniaj «Jeŭrabačańnia»».

Tady Annie K.Fernandez' raskazvała, što naradziłasia ŭ Bruklinie, žyła tam da troch hadoŭ, a vyrasła ŭ Biełarusi. Vučyłasia ŭ Minskaj dziaržaŭnaj muzyčnaj vučelni imia Hlinki.

Sa słoŭ samoj Kierman, z 2018 hoda jana vyvučała prykładnuju matematyku i finansavuju ekanomiku ŭ Kałumbijskim univiersitecie.

Daily Mail dadaje, što jana zasnavała IT-kansałtynhavuju kampaniju i nazyvaje siabie fieminisckaj piśmieńnicaj.

Jak usio pačynałasia, pavodle iska prafiesara

Pavodle iska Desejna, jany paznajomilisia na sajcie znajomstvaŭ i ŭpieršyniu paviačerali razam u lutym 2024 hoda.

Tady Kierman nazvałasia Vieranikaj i skazała, što joj 28 hadoŭ i što jana ź Litvy. Jana viedała, što jon žanaty, i spačatku kazała, što jaje zadavalniajuć nierehularnyja sustrečy. U isku śćviardžajecca taksama, što jana adkryta kazała pra sustrečy ź inšymi mužčynami, u tym liku z kitajskim miljarderam.

Z maja 2025 hoda prafiesar płaciŭ za jaje kvateru, pobytavyja vydatki, padarožžy i navučańnie ŭ anłajn-mahistratury. Pavodle iska, Kierman patrabavała padarunkaŭ i $6000 na miesiac na ŭtrymańnie. Što Desejn rehularna padtrymlivaŭ jaje hrašyma, u tym liku płaciŭ za navučańnie.

Pavodle viersii Desejna, Kierman havaryła pra šlub i dzicia i była apantanaja tym, kab jon pakinuŭ žonku, ź jakoj pražyŭ 18 hadoŭ, — Čžychun Čžan, byłuju top-mieniedžarku ŭ śfiery pryvatnych inviestycyj.

Vaŭter Desejn z žonkaj

Razryŭ i pahrozy

U studzieni 2026 hoda Desejn raskazaŭ žoncy pra raman, i para vyrašyła zachavać šlub. 21 studzienia jon patelefanavaŭ Kierman i skazaŭ, što spyniaje adnosiny. Pavodle iska, jana spačatku pahražała skončyć žyćcio samahubstvam, a potym pačała kazać pra toje, što «zrujnuje» jaho.

«Tak što, moj darahi, dla ciabie heta budzie brydka. Samaje horšaje, što ty možaš sabie ŭjavić», — cytuje isk słovy Kierman z zapisu razmovy. Tam ža jana skazała, što ŭniviersitet, chutčej za ŭsio, atrymaje ananimny list «pra ŭsio, što adbyłosia», i prafiesar moža stracić karjeru.

Pavodle iska, Kierman pahražała raskazać 22‑hadovamu synu pary pra padrabiaznaści ramana. Kali Desejn admoviŭsia adnavić adnosiny, jana nibyta adpraviła synu fota, dzie jany całujucca, i napisała, što baćka kaliści chacieŭ, kab maci zrabiła abort.

Žoncy prafiesara Kierman, pavodle iska, dasyłała abraźlivyja paviedamleńni. Jana nazyvała jaje «kitajskaj piensijanierkaj» i «značna starejšaj žančynaj na harmonach», a taksama raiła joj zrabić płastyčnuju apieracyju i ŭkoły botaksu, bo muž ciapier «raśpieščany naturalnaj maładościu i pryhažościu».

Skarha va ŭniviersitet i palicyju

U sakaviku Kierman, pavodle iska, paskardziłasia kiraŭnictvu Kałumbijskaha ŭniviersiteta, što prafiesar mieŭ niedapuščalnyja adnosiny sa studentkaj. Da momantu znajomstva jana ŭžo skončyła ŭsie kursy, ale farmalna ličyłasia studentkaj da 14 lutaha 2024 hoda — praz dva tydni paśla pieršaha spatkańnia. Pavodle Desejna, univiersitet zakryŭ spravu ŭ administracyjnym paradku i nie znajšoŭ u jaho dziejańniach parušeńniaŭ. U isku Jane Doe śćviardžajecca, što jana skazała prafiesaru, što zdała vypusknyja ekzamieny i chutka atrymaje dypłom. Pry hetym isk źviartaje ŭvahu, što ŭniviersitet zabaraniaje vykładčykam intymnyja adnosiny sa studentami.

U žniŭni Kierman, pavodle iska Desejna, pačała namiakać, što častka ich seksualnych kantaktaŭ adbyvałasia bieź jaje zhody. Paśla jana padała zajavu ŭ palicyju horada Ńju-Rašel. Prafiesar śćviardžaje, što pravaachoŭnyja orhany ź im nie kantaktavali, a zajava, pavodle jaho viersii, źmiaščaje iłžyvyja źviestki i była padadzienaja, kab atrymać ad jaho bolš hrošaj.

Desejn z žonkaj źjechali z ZŠA. Pavodle iska, ciapier jany «žyvuć u strachu za svaju biaśpieku». Para patrabuje kampiensavać bolš za $120 tysiač vydatkaŭ na jurystaŭ, $9000 na psichałahičnuju dapamohu i $45 tysiač stračanych płaciažoŭ za navučańnie syna.

Viersija Jane Doe

U isku Jane Doe śćviardžajecca, što 12 studzienia 2026 hoda, pierad sustrečaj u domie Desejna, jana papiaredziła jaho, što nie choča seksu, i paprasiła nie prymać leki ad erektylnaj dysfunkcyi. Pavodle iska, aboje zrazumieli heta tak, što ŭ toj viečar połavaha aktu nie budzie. Jana pahadziłasia na masaž jak zamienu seksu. Žančyna śćviardžaje, što potym prafiesar pranik u jaje, choć jana kazała «Ja jašče nie hatovaja» i «Spynisia, što ty robiš?», i što jon nie spyniŭsia. Pavodle iska, takija dziejańni adpaviadajuć zhvałtavańniu treciaj stupieni pavodle Kryminalnaha kodeksa štata Ńju-Jork.

21 studzienia Desejn, pavodle iska, raptoŭna skončyŭ adnosiny padčas videazvanka. Na nastupny dzień pazoŭnicu špitalizavali ŭ stanie «vostraha psichałahičnaha kryzisu». Jana paviedamiła pra zdareńnie ŭ palicyju i va ŭniviersitet. Jane Doe patrabuje kampiensacyi za seksualny hvałt, napad i naŭmysnaje pryčynieńnie maralnaj škody.

Pazicyi bakoŭ

Desejn u zajavie praz svaich advakataŭ ź firmy Dynamis LLP skazaŭ, što škaduje pra bol i źbiantežanaść, jakija raman pryčyniŭ jaho siamji.

«Ja kateharyčna admaŭlaju abvinavačvańni suprać mianie. Našy adnosiny byli dobraachvotnymi, i ja rašuča admaŭlaju, što choć adzin seksualny kantakt pamiž nami adbyvaŭsia biez zhody. Adnosiny skončylisia, kali ja vyrašyŭ zastacca z žonkaj i siamjoj», — zajaviŭ jon.

Pavodle jaho słoŭ, potym pačałasia «tryvožnaja kampanija pahroz, pieraśledu i patrabavańniaŭ hrošaj», nakiravanaja taksama na jaho žonku i dzicia. Jon dadaŭ, što ŭ jaho jość zapisy pahroz i pierapiska.

Kamientary1

  • Niefanatka
    19.11.2026
    A nado vsieho liš byť viernym žienie - i očień mnohich problem v žiźni udastsia iźbiežať

Ciapier čytajuć

Vid na Kałožskuju carkvu bieznadziejna sapsavany40

Vid na Kałožskuju carkvu bieznadziejna sapsavany

Usie naviny →
Usie naviny

Pamierła Hanna Sadoŭskaja — dziajačka polskaj supolnaści ŭ Vaŭkavysku1

«Lik idzie na chviliny, a svajaki pavinny biehać pa vulicy i šukać mužčyn». Ci pavinna chutkaja dapamoha vynosić pacyjenta z kvatery?13

«Pad kanvojem vyvieźli nas ź miažy». Rasijskaja błohierka raskazała pra zatrymańnie muža na biełaruskaj miažy praz padpisku5

Pamior 87‑hadovy turecki miljarder, ułaśnik minskaj Crowne Plaza. Ale hrošaj nie pakinuŭ ni žoncy-biełaruscy, ni čatyrom dzieciam62

Stvaralnica Belaruskicry upieršyniu paśla doŭhaj paŭzy raskazała, što ciapier z brendam paśla pryznańnia jaho ekstremisckim1

Ź ciahnika zblizku źniali na videa razburanuju častku Krymskaha mosta8

U centry Minska na moście 21‑hadovy pierakuliŭsia na BMW. Momant trapiŭ na videa2

Pravakacyja ź vialikaj kolkaściu achviar i abvinavačvańniem Ukrainy. Stała viadoma, jakuju pravakacyju rychtavali na polska-rasijskaj miažy7

Amierykanka pabiła rekord biełaruski pa kručeńni ŭ pavietry na ŭłasnych vałasach

bolš čytanych navin
bolš łajkanych navin

Vid na Kałožskuju carkvu bieznadziejna sapsavany40

Vid na Kałožskuju carkvu bieznadziejna sapsavany

Hałoŭnaje
Usie naviny →

Zaŭvaha:

 

 

 

 

Zakryć Paviedamić