Fiłasofskija hurtki, «vyšejšyja siły», płatnyja kursy, pašpart hramadzianina Mietahałaktyki — raskryta dziejnaść siekty
U Biełarusi zaviaršyli rasśledavańnie spravy siekty «Ivdziva», jakaja pad vyhladam fiłasofskich hurtkoŭ pravodziła relihijnyja abrady, pryciahvała novych udzielnikaŭ i pradavała płatnyja kursy. Arhanizacyja dziejničała z 2010 hoda.

Akramia Minska, padraździaleńni siekty pracavali ŭ Viciebsku, Žłobinie, Barysavie i Smalavickim rajonie. Na sustrečy prychodzili nie tolki biełarusy, ale i zamiežniki, jakija śpiecyjalna pryjazdžali ź inšych krain.
Jak vyśvietliła śledstva, u asnovie vučeńnia lažali akultnyja ŭjaŭleńni pra «vyšejšyja siły» i pierachod čałaviectva ź piataj rasy ŭ šostuju. Idejnym natchnialnikam arhanizacyi byŭ hramadzianin Rasii Vitalij Siardziuk, jaki raspaŭsiudžvaŭ svaje pohlady ŭ internecie.
Čaściej za ŭsio ŭ supolnaść traplali ludzi, jakija pieražyli ciažkija padziei: ułasnuju chvarobu abo chvarobu blizkich, śmierć svajakoŭ, stratu pracy. Novych udzielnikaŭ dałučali da arhanizacyi, pravodzili dla ich abrady «chryščeńnia», «nabaženstvy» i relihijnyja zaniatki. U hetyja praktyki ŭciahvali i dziaciej.
U arhanizacyi była svaja ijerarchija. Siarod pasad — «uładyka», «avatar sintezu», «kiraŭnik instytuta» i «paśviačony».


Asobna śledstva vyśvietliła, što siekta zarablała na tak zvanym «enierhaabmienie». Udzielnikam prapanoŭvali pieradavać hrošy i inšyja kaštoŭnaści, nazyvajučy ich «brudnaj» i «zastojnaj» enierhijaj. Uzamien abiacali «ačyščeńnie» i pavieličeńnie enierhietyčnaha patencyjału. Taksama paśladoŭnikam pradavali kursy, jakija nibyta dapamahali ŭstaloŭvać mistyčnyja kantakty z «vyšejšymi siłami».
Ahulny dachod arhanizacyi, ustanoŭleny śledstvam, pieravysiŭ 220 tysiač rubloŭ.

Doŭhi čas dziejnaść siekty prykryvali hramadskija abjadnańni i fiłasofskija kłuby, stvoranyja jaje paśladoŭnikami. Pry hetym, pavodle źviestak pravaachoŭnikaŭ, abvinavačanyja viedali, što dla relihijnaj dziejnaści nieabchodnaja dziaržaŭnaja rehistracyja, ale praciahvali pracavać bieź jaje.
Padčas rasśledavańnia niekatoryja fihuranty zajaŭlali, što kantaktujuć z pradstaŭnikom «vyšejšych sił», jaki nibyta padkazvaje im, jak adkazvać na pytańni śledčych. Usich abvinavačanych pravieryli na najaŭnaść psichičnych rasstrojstvaŭ. Ekśpiertyzy pakazali, što jany mohuć nieści adkaznaść za svaje dziejańni.
Abvinavačańni pavodle artykuła 193¹ KK Biełarusi (niezakonnaja arhanizacyja dziejnaści relihijnaj arhanizacyi i ŭdzieł u joj) pradjavili 16 asobam. Kryminalnuju spravu pieradali prakuroru dla nakiravańnia ŭ sud.
Rasśledavańnie ŭ dačynieńni da inšych mahčymych udzielnikaŭ arhanizacyi praciahvajecca, u tym liku va ŭzajemadziejańni z zamiežnymi kalehami.
Kamientary