Палітычныя вязьні, якія ўтрымліваюцца ў менскім спэцпрыёмніку-разьмеркавальніку на вуліцы Акрэсьціна, перадалі на волю заяву, у якой выказалі стаўленьне да падзеяў 25 сакавіка. «Крывавыя падзеі 25 сакавіка – гэта сведчаньне агоніі рэжыму Лукашэнкі. Гэта дэманстрацыя няздольнасьці выйграць выбары па правілах цывілізаваных краінаў. Адказнасьць за жыцьцё і здароўе пацярпелых цалкам ляжыць на Лукашэнку і яго сілавых міністрах.
Прэзыдэнцкая кампанія-2006 увойдзе ў эўрапэйскую гісторыю як самая цынічная, бессаромная і крывавая. Беларускі рэжым ня толькі пайшоў на татальную фальсіфікацыю вынікаў галасавання, але і на выкарыстанне зброі.
Мы патрабуем тэрміновай адстаўкі міністра ўнутраных справаў Навумава і старшыні КДБ Сухарэнкі, а таксама ўсіх, хто аддаваў загады на ўжыцьцё спэцсродкаў і зброі», – гаворыцца ў дакумэнце.
Як паведамілі Радыё Свабода ў прэсавай службе Аб’яднанай грамадзянскай партыі, заяву падпісалі старшыня Нацыянальнага камітэту аб’яднаных дэмакратычных сілаў Анатоль Лябедзька, намеснік старшыні Аб’яднанай грамадзянскай партыі Аляксандр Дабравольскі, намеснік старшыні Партыі БНФ Аляксей Янукевіч, тэатральны рэжысэр Валеры Мазынскі, скульптар Алесь Шатэрнік і іншыя – усяго 500 подпісаў.
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары