Уначы на Майдане штогадзіну спяваюць «Шчэ нэ ўмэрла Украіна» пад сола Русланы - рэпартаж Кірылы Хілька з Кіева
Перадае з Кіева карэспандэнт «Нашай Нівы» Кірыла Хілько.
Сённяшняя ноч на Еўрамайдане была як ніколі трывожнай. Яшчэ а другой гадзіне дня 4 снежня на ўкраінскіх інфармацыйных парталах з'явілася інфармацыя пра магчымы разгон дэманстрацыі. Паведамлялася, нібыта міліцыі было загадана зачысціць плошчу. Пры гэтым нібыта мусілі адключыць усё асвятленне і камеры відэаназірання.
Майдан быў гатовы да такога сцэнара, а чуткі ўзмацнілі пільнасць: у параўнанні з мінулымі днямі барыкады разрасліся як ушыркі, так і ўвышкі.
Аргкамітэт Еўрамайдану паведаміў журналістам пра рост колькасці абаронцаў Майдана: варту ўзначалілі афіцэры запасу, некаторыя з іх нават ваявалі ў Афганістане.
Сапраўды, цяпер ля барыкад пастаянна дзяжураць людзі ў камуфляжы — напрыклад, на вул. Інстытуцкай было заўважана некалькі дэсантнікаў — якія каардынуюць дзеянні іншых абаронцаў.
У самаахове Майдану каля 2000 чалавек, яны падзеленыя на чатыры групы і, сцвярджаюць яны, могуць супрацьстаяць нават «Беркуту».
Бліжэй да ночы ўзмацнілі пільнасць валанцёры: яны ўважліва аглядалі тых, хто заходзіць ці выходзіць у штаб у Доме прафсаюзаў ці на сам Майдан Незалежнасці, дый колькасць валанцёраў на варце мінулай ноччу была большай, чым у папярэднюю.
Калі з'явілася інфармацыя, што ў горадзе Васількоў за 30 кіламетраў ад Кіева мясцовыя актывісты заўважылі на тэрыторыі вайсковай вучэльні каля 30 аўтобусаў з «Беркутам» з усходніх абласцей, якія «чакаюць загаду рухацца на Кіеў», людзі адправіліся туды на машынах і блакавалі выезд з вучэльні. Яны выпускалі толькі легкавікі з цывільнымі асобамі.
Насамрэч, тая навіна не выклікала даверу, бо з дакументальных пацверджанняў прысутнасці «Беркута» ў Васількове быў толькі сюжэт канала ТСН.
Каб перастрахавацца, актывісты рушылі і на Чырвоназорны праспект, дзе знаходзіцца база кіеўскага «Беркута», і таксама блакавалі выезд уласнымі аўтамабілямі.
Відэасюжэт канала ТСН пра «Беркут» у Васількове:
Больш за ўсіх верылі ў магчымы сілавы сцэнар расійскія журналісты — яны знаходзілі яскравыя паралелі Еўрамайдану і падзей на Балотнай плошчы 6 мая. Украінскія калегі ставіліся да магчымага разгону больш скептычна, бо менавіта сілавы разгон першага Еўрамайдану і падзеі на вуліцы Банкавай ператварылі Еўрамайдан у тое, чым ён ёсць цяпер.
Вартавыя на барыкадах таксама сумняваліся, што ўлады рашацца на зачыстку. Некаторыя лічылі распаўсюд такой інфармацыі правакацыяй, накіраванай на стварэнне нервовай атмасферы і панікі.
«Ну хай паспрабуюць сунуцца, мы будзем іх чакаць», — паціснуў плячыма адзін з ахоўнікаў барыкад.
У выніку нічога кепскага не адбылося, і ўся ноч прайшла надзвычай мірна. Трэба адзначыць, што людзей нават пабольшала ў параўнанні з мінулымі днямі.
Усю ноч для людзей спявалі рок-гурты, барды, гралі музыкі, чыталі вершы паэты. Каардынатарам начной актыўнасці, як і раней, была спявачка Руслана — яна дзяжурыць на Майдане кожную ноч.
У пачатку кожнай гадзіны людзі запальваюць ліхтарыкі на сваіх мабільных тэлефонах і разам з Русланай спяваюць дзяржаўны гімн Украіны. З пачаткам новага дня арганізатары сабралі калону пратэстоўцаў, якая, як заўжды, рушыла ў бок Адміністрацыі прэзідэнта.
Апытанка
Спявак Дзмітрый Калдун паказаў сваю мінскую кватэру недалёка ад Драздоў ШМАТ ФОТА15
Каментары