Нацыянальны банк Беларусі ў 2014 годзе не будзе змякчаць грашова-крэдытную палітыку на фоне дасягнутых дамоўленасцяў у частцы прыцягнення неабходных аб'ёмаў знешніх пазычанняў для папаўнення дзяржаўных золатавалютных рэзерваў, «наадварот, жорсткасць падыходаў да яе правядзення будзе ўзмоцнена».
Адпаведныя рашэнні прыняты на пасяджэнні праўлення Нацыянальнага банка 3 студзеня, паведамляе ўпраўленне інфармацыі і грамадскіх сувязяў Нацбанка.
Так, рэалізацыя мер па павышэнні эфектыўнасці банкаўскага крэдытавання дазволіць у I квартале гэтага года абмежаваць прырост патрабаванняў да эканомікі на ўзроўні да 0,7% у сярэднім за месяц. Такія тэмпы крэдытавання адпавядаюць гадавому прагнозу, дазваляюць забяспечваць неабходнае развіццё эканомікі без негатыўнага ўплыву на макраэканамічную збалансаванасць.
«Жорсткасць падыходаў да рэфінансавання банкаў з боку Нацыянальнага банка таксама будзе ўзмацняцца, стымулюючы банкі забяспечваць правядзенне актыўных аперацый строга ў адпаведнасці з наяўнымі рэсурснымі магчымасцямі», — адзначылі ў Нацбанку.
Стаўка рэфінансавання ў студзені 2014 года захаваецца на ранейшым узроўні, а «надалей яе змяненні будуць ажыццяўляцца ў залежнасці ад дынамікі інфляцыі і сітуацыі на фінансавым рынку і насіць плаўны характар».
«Пры гэтым базавым прынцыпам працэнтнай палітыкі ў 2014 годзе застанецца падтрыманне даходнасці па рублёвых інструментах, якая перавышае даходнасць захоўвання сродкаў у замежнай валюце і забяспечвае надзейную абарону зберажэнняў ад інфляцыі. У сваю чаргу, гэта будзе садзейнічаць умацаванню даверу да нацыянальнай валюты і дэдаларызацыі эканомікі», — адзначаецца ў каментары.
Як запэўнівае Нацбанк, сёлета працягнецца правядзенне курсавой палітыкі, якая забяспечвае фарміраванне абменнага курсу беларускага рубля на аснове попыту і прапановы. Пры гэтым Нацыянальны банк «не дапусціць рэзкіх ваганняў курсу, згладжваючы іх сваімі інструментамі».
Каментары