У Буда-Кашалёве 35-гадовы мужчына забіў жонку і спрабаваў застрэліцца сам.
Як паведаміў БелаПАН афіцыйны прадстаўнік упраўлення Следчага камітэта па Гомельскай вобласці Марыя Крываногава, каля гадзіны ночы 25 мая паміж мужам і жонкай разгарэлася спрэчка з-за курэння жанчыны.
Мужчына і жанчына жылі разам ужо шмат гадоў, а напярэдадні, 24 мая, распісаліся ў загсе.
Паводле слоў падазраванага, жонка абяцала кінуць курыць пасля вяселля. Аднак вечарам, пасля таго як яны адзначылі свята і госці пайшлі, мужчына заўважыў жонку з цыгарэтай, што яго вельмі раззлавала, успыхнула сварка. Сведкай гэтага была маці жанчыны. Мужчына, знаходзячыся ў стане моцнага алкагольнага ап'янення, узяў стрэльбу і выстраліў жонцы ў галаву, ад атрыманых траўм яна памерла на месцы.
Пасля чаго мужчына стрэліў сабе ў горла, аднак куля затрымалася ў паднябенні. Маці забітай, калі апамяталася, патэлефанавала ў хуткую і міліцыю.
Цяпер мужчына знаходзіцца на лячэнні ў раённай бальніцы пад канвоем. Стрэльба, з якой была забітая жанчына, зарэгістраваная, мужчына з'яўляецца паляўнічым. Апошнім часам ён ездзіў на заробкі ў Расію, раней не судзімы. Агульных дзяцей не было.
Распачата справа аб забойстве на падставе часткі 1 артыкула 139 Крымінальнага кодэкса, вядзецца следства, падазроны дае паказанні.
Цяпер чытаюць
КДБ запусціў новы бот у тэлеграме для вярбоўкі беларусаў за мяжой. Прапануюць расклейваць улёткі, фатаграфаваць аб'екты і «нешта іншае»4
Каментары