У Еўрасаюзе не выключаюць, што ў выпадку адмовы ад абмеркавання пытання аб адмене віз для беларускіх грамадзян, якія маюць дыпламатычныя пашпарты, у перамовах па пагадненні аб спрашчэнні візавага рэжыму з Беларуссю могуць узнікнуць праблемы.
Як паведаміла крыніца ў Еўракамісіі, падчас сустрэч з беларускім бокам зімой гэтага года пры падрыхтоўцы да пачатку перамоў па пагадненнях аб аблягчэнні візавага рэжыму і рэадмісіі пытанне пра адмену віз для беларускіх дыпламатаў і членаў афіцыйных дэлегацый не ўзнімалася. Аднак падчас першага раўнда перамоў, які адбыўся ў Мінску 12 чэрвеня, сярод прапаноў, унесеных беларускім бокам, была і адмена віз для ўладальнікаў дыппашпартоў.
Праблема заключаецца ў тым, падкрэсліла крыніца, што цяперашні мандат на правядзенне перамоў з Беларуссю па пагадненнях аб спрашчэнні візавага рэжыму і рэадмісіі, выдадзены Еўракамісіі ў 2011 годзе, не прадугледжвае магчымасць абмеркавання пытання пра адмену віз для дыпламатаў. Для правядзення перамоў па гэтым пытанні неабходна атрымаць яшчэ адзін мандат, які выдае Савет ЕС.
Крыніца выказала сумненне ў тым, што такі мандат будзе выдадзены, калі палітычная сітуацыя ў Беларусі не зменіцца і калі афіцыйны Мінск «не зробіць якіх-небудзь пазітыўных захадаў».
У той жа час яна адзначыла, што на перамовах на мінулым тыдні беларускі бок выразна даў зразумець, што вельмі зацікаўлены ў станоўчым вырашэнні пытання наконт адмены віз для ўладальнікаў дыпламатычных пашпартоў.
Паводле слоў крыніцы, у ЕС не выключаюць, што ў выпадку адмовы Беларусь можа адмовіцца ад перамоў у цэлым. Афіцыйны Мінск можа такім чынам «адыграцца на простых грамадзянах». «Кітай таксама выкарыстоўвае такую тактыку», — дадаў суразмоўца.
Раней іншая крыніца ў ЕС паведаміла, што адным з пазітыўных захадаў магло б стаць вызваленне беларускіх палітзняволеных.
Цяпер чытаюць
Былога беларускага палітвязня судзяць у Літве за падрыхтоўку да забойства праціўнікаў Крамля. Пагражае аж да пажыццёвага10
Каментары