Ніхто для Беларусі не будзе ствараць ільготных умоў для ўваходжання ў Раду Еўропы. Аб гэтым заявіў дырэктар стратэгічнага планавання РЕ, пасол Пётр Святальскі 4 лістапада на сустрэчы з беларускімі журналістамі ў Страсбургу.
«У беларускага кіраўніцтва пакуль няма палітычнай волі выканаць патрабаванні, звязаныя з членствам у Радзе Еўропы, але льготных умоў для Беларусі ніхто ствараць не мае намеру. Яна будзе разглядацца як і ўсе астатнія краіны», — сказаў еўрадыпламат.
Ён адзначыў, што са снежня 2010 года няма ніякага пазітыўнага развіцця супрацоўніцтва Беларусі і РЕ, пры гэтым падкрэсліў, што членства ў арганізацыі «карыснае для дзяржавы».
«Не лічу, што для аблічча дзяржавы добра быць адзінай краінай у Еўропе, якая не ўваходзіць у Раду. Гэта дрэнна адбіваецца на іміджы, — упэўнены Святальскі. — Але вам трэба самім больш актыўна дзейнічаць у плане развіцця супрацоўніцтва з РЕ. У Рады Еўропы вельмі шмат іншых праблем. Праца з краінамі-не членамі ідзе, але яна далёка не на першым месцы на парадку дня.»
Палітык адзначыў, што ўсе краіны — члены РЕ разумеюць, што стаяць у адзінай еўрапейскай сям'і.
«Вядома, Беларусь мае права на выбар і мае права на пазіцыю «мы не хочам быць з усімі — мы хочам адны стаяць у куце». Але пытанне, у імя якой стратэгічнай мэты выбіраецца адзінокае стаянне ў куце? Я гэтага не разумею», — заявіў Святальскі.
Пры гэтым ён падкрэсліў, што вельмі многія цяпер мяркуюць, што ў Азербайджане, які ўваходзіць у Раду Еўропы, палітычных свабод значна менш. «Але яны вырашылі, што хочуць быць членамі РЕ, і хоць іх вельмі рэзка крытыкуюць, выходзіць з арганізацыі не маюць намеру. І я не магу зразумець, чаму беларускія ўлады лічаць, што лепш не быць у Радзе Еўропы», — сказаў пасол.
Ён адзначыў, што ў беларускім грамадстве ніколі не было адкрытага абмеркавання выгад і страт ад паўнацэннага членства ў РЕ. Прадстаўнік арганізацыі мяркуе, што дзяржава ўстрымліваецца ад уваходжання ў Раду Еўропы з-за наяўнасці вялікай колькасці спраў у Еўрапейскім судзе па правах чалавека.
Аднак, падкрэсліў ён, ва ўсіх краін пры ўваходжанні ў Раду Еўропы ў першыя 10 гадоў назіраўся вялікі рост колькасці зваротаў у ЕСПЧ, але потым іх станавілася менш.
«Лічу, што большасць беларусаў былі б «за» далучэнне да Рады Еўропы. З усіх міжнародных інстытутаў менавіта ён, з пункту гледжання простага чалавека, — самая карысная арганізацыя, бо праз свае канвенцыі сочыць за выкананнем правоў чалавека ў краінах-членах», — сказаў Святальскі.
Ён нагадаў, што цяпер у адносінах паміж Беларуссю і Радай Еўропы стаяць дзве асноўныя праблемы: прымяненне смяротнай кары і наяўнасць палітзняволеных.
23‑гадовага афіцэра брыгады спецназа асудзілі на 19 гадоў за «здраду дзяржаве»17
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары