«Ідзі адсюль, пятая калона!» – як у цэнтры Мінска камуністы збіраюць подпісы за Лукашэнку пад сцягам СССР
Чарговы пікет ў падтрымку дзеючага кіраўніка краіны быў заўважаны ля ГУМа. Здзівіла толькі, што побач з цяперашнім дзяржаўным сцягам лунаў яшчэ і савецкі, чырвоны з сярпом і молатам.
Высветлілася, што ў пікеце стаяць прадстаўнікі Камуністычнай партыі Беларусі – Андрэй Цвірко і Уладзімір Хіневіч.
На пытанне, што на вуліцах Мінска робіць сцяг СССР, яны адказалі так:
«Гэта гісторыя. 70 гадоў гісторыі нікуды не выкінеш. І за 70 гадоў тут зрабілі з сялянскай краіны індустрыяльную. Усе гарады пабудавалі. А казаць пра цану гэта бессэнсоўна, бо паўсюль цана ёсць, і ў Амерыцы, і Францыі…»
Праўда, далей дыялог атрымаўся дзіўнаватым.
«НН»: «А знішчэнне беларускай інтэлігенцыі, гэта што, адэкватная цана?»
Цвірко: «Вы ведаеце, нельга сказаць, што ў Савецкім Саюзе не было беларускай інтэлігенцыі і не выдаваліся кнігі на беларускай мове…»
«НН»: «Вы не адказваеце на пытанне. Знішчэнне інтэлігенцыі – адэкватная цана за індустрыялізацыю?»
Цвірко: «Я вам скажу так, была барацьба. Белыя расстрэльвалі чырвоных, а бандэраўцы выразалі старшыняў раёнаў».
«НН»: «Калі? Якія бандэраўцы? Я пытаюся пра знішчэнне інтэлігенцыі».
Цвірко: «Я не кажу, што гэта адэкватная цана. Я не кажу, што гэтае знішчэнне было».
«НН»: «То бок, не было?»
Цвірко: «Я лічу, што не».
Затым я заўважыў на паперцы аднаго з іх рукапісную пазнаку: «НОД [Нацыянальна-вызвольны рух] Беларусь. YouTube». Спроба сфатаграфаць яе выклікала абурэнне. Камуністы адразу перайшлі на «ты» і параілі мне «ісці адсюль», бо я належаў да «сапсаванага пакалення». Высветлілася, што калі я не падпісваюся за Лукашэнку, дык я не магу і піць ваду (сваю!) пад іх парасонам.
«Ідзі адсюль, пятая калона! Надакучыла ўжо з вамі размовы весці!» – параіў мне зборшчык подпісаў камуніст Андрэй Цвірко.
Цяпер чытаюць
Разведка ЗША: Беларусь стала перадавым вайсковым плацдармам Расіі27
Каментары