На гарадзенскага бамжа завялі крымінальную справу за дзесяць з'едзеных катлет
У Горадні на мясцовага бамжа, які зьеў у чужой кватэры дзесяць катлет, заведзена крымінальная справа. Аб гэтым паведамляецца на сайце УУС Гарадзенскага аблвыканкаму.
Галодны мужчына пракраўся ў жытло праз фортку. На той момант у кватэры нікога не было. Добра павячэраўшы дзесяцьцю адбіўнымі катлетамі, валацуга пакінуў кватэру. З сабой бомж нічога ня ўзяў, адзначыў падпалкоўнік міліцыі, начальнік крымінальнага вышуку Ленінскага РАУС Горадні Віталь Асоцкі.
Паводле яго слоў, 47-гадовы падазраваны нядаўна адбыў пакараньне за рабунак, а таксама прайшоў курс лячэньня ад алькагалізму. Мужчына, як патлумачыў Асоцкі, пачаў жабраваць праз адсутнасьць працы і грошай.
Тое, што адбылося, было кваліфікавана па артыкуле 205 Крымінальнага кодэксу Беларусі («Крадзеж»).
Каментары