Касьцян пра зьбіцьцё на Дзень Волі: «Я ня бачу нічога страшнага. У Англіі і Францыі і па 200 чалавек невінаватых растрэльваюць. І нічога»

Дэпутаты пра разгон сьвяткаваньня 90-годзьдзя БНР.

Аднак беларускія парламентарыі, якія павінны клапаціцца пра сваіх выбаршчыкаў, кажуць, што ўсё было зроблена правільна і вінавацяць ва ўсім саміх апазіцыянераў.

Павялічыць

Павялічыць

Павялічыць

Старшыня пастаяннай камісіі Савета Рэспублікі Нацыянальнага сходу Беларусі па нацыянальнай бяспецы і міжнародным адносінам Мікалай Чаргінец заявіў «Рацыі», што не лічыць дзеянні міліцыянтаў жорсткімі, і «грош цана той уладзе, якая не можа сабе абараніць»

Гэта не жорсткасць, пагадзіцеся, калі ўзялі людзей за рукі, пасадзілі ў машыну і цяпер прыцягнуць да адміністратыўнай адказнасці. Я разумею, што будуць пісаць, і вы, напэўна, таксама, маўляў, пасадзілі людзей у турму. Быццам бы гэта крымінальнае злачынства. А насамрэч гэта звычайнае адміністратыўнае парушэнне, якое ёсць у любой краіне. Людзі парушылі закон — хай адказваюць.

Паводле спадара Чаргінца, дзеянні апазіцыі падчас Дня Волі былі скаардынаваныя «заходнімі спецслужбамі» і накіраваныя яны перш за ўсё на тое, каб пашкодзіць беларуска‑еўрапейскім адносінам:

‑ Арганізатары падобных акцый падсілкоўваюцца з боку спецслужбаў Захаду. І, зразумела, што яны не хочуць губляць гэтую крыніцу фінансавання. І яны робяць такія правакацыі. Я спадзяюся, што ў заходніх палітыкаў хоць на гэты раз хопіць розуму даць правільную ацэнку ўчорашнім падзеям.

Падтрымлівае жорсткі разгон мірнай дэманстрацыі і намеснік старшыні міжнароднай камісіі Палаты прадстаўнікоў Сяргей Касцян:

‑ Я не бачу нічога страшнага. У Англіі і Францыі і па 200 чалавек невінаватых растрэльваюць. І нічога. І дыялог хочуць з намі весці. І мы будзем весці з імі дыялог.

Сябар міжнароднай камісіі Сяргей Гайдукевіч упэўнены, што ўчорашнія падзеі ў Мінску ніякім чынам не паўплываюць на беларуска‑еўрапейскія стасункі:

‑ Як Еўропа павінна рэагаваць, калі прыходзяць 300 чалавек з году ў год, ну, можа, 400. Адныя і тыя ж людзі. Астатнія гэта тыя, хто па сваіх службовых абавязках прыходзіць у цывільным, каб сачыць за першымі? Ну як любы рэальны палітык можа на такое рэагаваць. Трызненне гэта ўсё!

Сябар камісіі па правах чалавека, нацыянальным адносінам і СМІ Аляксандр Свірыд кажа, што не вітае дзеянні апазіцыі, якія разыходзяцца з законам. Як і атрымалася падчас святкавання 90‑годдзя БНР. Паводле яго, апазіцыя наўмысна правакуе ўлады, каб зрабіць прыгожую карцінку для Захаду:

‑ Я да такіх пытанняў стаўлюся вельмі негатыўна з боку арганізатараў масавых мерапрыемстваў. Таму што яны праходзяць так, каб заўсёды былі арыштаваныя і збітыя. Ну, хай не лезуць, не напрошваюцца і не падстаўляюць свае пысы пад гэтыя справы.

Але ўсё ж большасць парламентарыяў адмовілася каментаваць «Рацыі» учорашнія падзеі, далікатна спасылаючыся на тое, што нічога не чулі ні пра Дзень волі, ні пра 90‑годзе БНР. Можа, канешне, і хлусяць. Але як праверыш!

Кастусь Вансяцкі, Радыё Рацыя

• 0
• 0
• 0
• 0
• 0
• 0
• 0
• 0