Бухгалтарка мінскай фірмы скрала больш за 1,7 млрд рублёў
Праверкай упраўлення па барацьбе з эканамічнымі злачынствамі УУС Мінаблвыканкама выяўленыя факты неаднаразовага завалодання грашовымі сродкамі фірмы галоўным бухгалтарам менскага прадпрыемства прыватнай формы ўласнасці.
Як паведаміў пракурор аддзела па наглядзе за дазнаннем пракуратуры Мінскай вобласці Кірыл Бубноў, на працягу двух гадоў 33-гадовая жанчына, маючы права электроннага подпісу плацежных даручэнняў прадпрыемства, пералічвала грошы з рахунку арганізацыі на свае асабістыя карт-рахункі за фіктыўна аказаныя паслугі.
Факты крадзяжоў бухгалтарам грашовых сродкаў былі выяўлены дырэктарам, аднак, з прычыны абяцанняў вярнуць выкрадзеныя грошы, з супрацоўніцай не былі скасаваныя працоўныя адносіны. У далейшым дырэктар асабіста кантраляваў усе плацежныя аперацыі фірмы, аднак галоўны бухгалтар працягвала свае злачынныя дзеянні. Нахабна падманваючы кіраўніка, яна друкавала ў плацежных даручэннях усе рэквізіты для пералічэння грашовых сродкаў у бюджэт у выглядзе падаткаў, аднак нумар банкаўскага рахунку наўмысна паказвала камерцыйнай фірмы, дзе сама таксама працавала бухгалтарам, куды і накіроўваліся грашовыя сродкі, якімі пасля жанчына распарадзілася па ўласным меркаванні.
Усяго, выкарыстоўваючы сваё службовае становішча ўпотай ад кіраўніцтва, яна выкрала больш за 1,7 млрд рублёў.
Са слоў службовай асобы, на здзяйсненне гэтага злачынства яе падштурхнула цяжкае матэрыяльнае становішча, а таксама нерэнтабельнасць салона прыгажосці, які ёй належаў. На яго развіццё і была выдаткаваная асноўная сума выкрадзеных грашовых сродкаў.
Па дадзеным факце пракуратура Мінскай вобласці распачала крымінальную справу па прыкметах складу злачынства, прадугледжанага ч. 4 арт. 210 КК (крадзеж маёмасці ў асабліва буйным памеры шляхам злоўжывання службовымі паўнамоцтвамі). Санкцыя названага артыкула прадугледжвае пакаранне ў выглядзе пазбаўлення волі на тэрмін ад пяці да дванаццаці гадоў з канфіскацыяй маёмасці і з пазбаўленнем права займаць пэўныя пасады або займацца пэўнай дзейнасцю.
Каментары