Прэзідэнт Узбекістана Іслам Карымаў пахаваны ў сябе на радзіме ў Самаркандзе 3 верасня. Пра смерць Карымава пасля перанесенага інсульту паведамілі 2 верасня. Развітацца з першым прэзідэнтам краіны прыйшлі тысячы жыхароў Ташкента і Самарканда, а таксама прыбылі афіцыйныя дэлегацыі з 17 краін. Беларускую дэлегацыю ўзначаліў прэм'ер-міністр Андрэй Кабякоў.
Цырымонія развітання прайшла ў цэнтры горада на плошчы Рэгістан. Адтуль цела прэзідэнта, па мусульманскім абрадзе загорнутае ў 21-метровы саван, сваякі на руках аднеслі на старажытныя могілкі Шахі-Зінда, дзе Карымаў быў пахаваны побач са сваімі бацькамі, паведамляе Sputnik Узбекістан са спасылкай на Дзяржаўную нацыянальную тэлерадыёкампанію краіны.
Перад цырымоніяй развітання ў бацькоўскай хаце Іслама Карымава правялі нацыянальныя пахавальныя абрады.
Развітацца з прэзідэнтам прыйшлі гараджане, людзі неслі кветкі, шмат хто плакаў. У Самарканд цела прэзідэнта даставілі на самалёце з Ташкента. Жыхары сталіцы таксама праводзілі прэзідэнта ў апошні шлях. Там раніцай жалобны картэж праехаў па звыклым прэзідэнцкім маршруце па вуліцах Ташкента ў бок аэрапорта.
Каментары