У прысутнасці прэзідэнта РФ Уладзіміра Пуціна Леанід Рашэтнікаў, які выклікаў пратэст беларускага МЗС выказваннямі пра беларускую мову, перадаў паўнамоцтвы свайму пераемніку на пасадзе — былому прэм'ер-міністру, а пасля — кіраўніку Службы замежнай разведкі Міхаілу Фрадкову.
«Хачу вам падзякаваць за працу, якую вы зрабілі, кіруючы Расійскім інстытутам стратэгічных даследванняў (РІСД), нямала было зроблена, вельмі разлічваю, што Міхаіл Яфімавіч гэта працягне», — сказаў Пуцін Рашэтнікаву, як сведчыць ролік, размешчаны на афіцыйным акаўнце РІСД.
Кантракт Рашэтнікава на кіраўніцтва РІСД скончыўся і не будзе працягнуты, бо па законах РФ кіраўнік такіх дзяржаўных інстытутаў не можа быць старэйшым за 70 год, напісаў супрацоўнік інстытута Алег Неменскі ў сваім блогу.
«Усе перамены натуральныя і чаканыя, ніякіх рэвалюцый у працы інстытута няма», — піша Неменскі.
«Леанід Пятровіч пакідае добры калектыў з добрым іміджам і напрацоўкамі, які гатовы адказваць на задачы, якія вы ставіце», — адказаў Пуціну Фрадкоў.
«Восем год мы як маглі працавалі, рэалізуючы вашую лінію ў замежнай палітыцы… Упэўнены, што калектыў разам з Міхалам Яфімавічам будзе гэтак жа паспяхова рэалізоўваць гэтую лінію», — сказаў Рашэтнікаў Пуціну.
У снежні Рашэтнікаў, былы генерал расійскай разведкі, заявіў, што Беларусь — штучная краіна, а беларуская мова — штучная мова, створаная бальшавікамі. Гэтыя заявы выклікалі рэзка адмоўную рэакцыю беларускага грамадства і Міністэрсва замежных спраў Беларусі.
Фрадкоў у 2004—2007 гадах быў прэм'ер-міністрам Расіі, у 2007—2016 узначальваў Службу замежнай разведкі РФ.
Каментары