Тэма «Белага легіёна» не сыходзіць са старонак дзяржаўных СМІ. На гэты раз выказаўся Андрэй Мукавозчык, заснавальнік беларускага Клуба вясёлых і знаходлівых. Ураджэнец расійскага Навасібірска — сталы калумніст «Советской Белоруссіі».
«Большасць «незалежных» сайтаў, можна нават так выказацца, распісалася ва ўласнай безадказнасці. Пераказ, непераканаўчая з'едлівасць, няўдалая іронія, вырыванне цытат… — абураецца Мукавозчык. — Не ў брыво, а ў вока, відаць, прыйшоўся папрок журналістаў БТ, што «незалежныя СМІ працавалі на папулярызацыю мітынгаў». А што — хіба не так было? Так. Таму цяпер, пакуль следчыя працуюць, трэба тэрмінова «адпаўзці» хоць трохі далей ад смуроднай ямы, якую — па замове або па неабдуманасці — самі ж і дапамагалі рыць. «Штампы», «страшылкі», «брэд» і «палохаюць» — вось і ўся, даруй Божа, «аналітыка з аргументамі».
«Прапаганда, вымыслы, намёкі, маркеры» — не пра тое вы, спадары! Японскі «журналіст» — «дудаевец», «ігілавец», ісламіст, арыштаваны курдамі пад Масулам, якога высылалі з Ірака, які ўзяўся прыляцець да нас з Кіева, — ён быў ці не? Затрыманыя «легіянеры» — ездзілі на Майдан па вопыт? УНА-УНСО на «Чарнобыльскі шлях» запрашалі, сялілі, залагоджвалі? Было такое? Не бегалі дарослыя дзядзькі, «легіянеры», па нашых лясах, не вучыліся страляць, схрон не капалі — так ці не? Фактаў прыведзена дастаткова, хоць адзін вы можаце аспрэчыць? Не можаце. А гэта ж усё вашы «героі», вы пра іх пісалі, інтэрв'ю бралі, у рот глядзелі. Вось і даводзіцца толькі адбрэхвацца ў спробах хоць неяк захаваць твар», — працягвае шоумэн.
«І яшчэ факты: забаўна, што 10 сакавіка ў Маладзечне былі затрыманыя трое «лідараў», 12 сакавіка ў Оршы быў затрыманы яшчэ адзін. Усе атрымалі па 15 сутак і паспяхова «перасядзелі» мінскія падзеі 25 сакавіка. Да 24 сакавіка свае подпісы пад заяўкай на правядзенне акцыі і шэсця адклікалі ўсе — усе! — заяўнікі, гэта яшчэ 5 грамадскіх рухаў і партый і іх кіраўніцтва. А Статкевіч, які гучней за ўсіх заклікаў «на плошчу», і зусім загадкава знік… Што ж атрымліваецца, ўсе пра ўсё ведалі? Падазравалі? Спінным мозгам адчувалі? Падобна на тое, так. Усё гэта — «незалежнымі каментатарамі» не аспрэчваецца», — падсумоўвае Мукавозчык.
Лукашэнку стала дрэнна на саміце ШАС у Казахстане — Дождь7
Каментары