«У гэтыя хвіліны разбіраюць стары млын у Ашмянскім раёне. Разбіраюць на дровы.
Я разумею: статуса ахоўнага не мае. Але пазваніў старшыню СВК «Гальшанскі» Мікалаю Праўко, прапанаваў розныя варыянты: ці выкупіць аб'ект як дровы, ці падпісаць дамову з імі аб даглядзе аб'екта, ці купіць ім дровы. Любы варыянт. У адказ было: «Не дуры мне галавы», — напісаў у фэйсбуку краязнаўца, дырэктар фонду «Краіна замкаў» Алесь Варыкіш.
Гаворка ідзе пра будынак млына ХІХ—ХХ ст. у вёсцы Нарушаўцы Ашмянскага раёна, частку колішняга фальварку Зацішак.
«Які помнік? Там аварыйнае ўсё, абваліцца. Ён у нас на балансе, не трэба ён нам», — пракаментаваў карэспандэнту НН сітуацыю старшыня СВК «Гальшанскі» Мікалай Праўко.
Алесь Варыкіш не згодны: «Варыянты былі. Драўляны будынак — гэта мазаіка: выняў папсаваную частку — уставіў здаровую. І старэйшыя драўляныя будынкі стаяць. Чаму б было не пайсці насустрач, не захаваць гэты? Пасля яго знікнення на ўсім раёне стары млын застанецца толькі ў Гальшанах».
Млын у Нарушаўцах, на рацэ Гальшанцы, мае турыстычны патэнцыял: гэта адзін з аб'ектаў турыстычнага маршруту «Гальшанская пятля».
Цяпер чытаюць
Ціханоўская едзе ў Нью-Ёрк. Яна можа перасекчыся з прадстаўнікамі Лукашэнкі, але галоўную інтрыгу пакуль не раскрываюць11
Каментары