Крыніцы: у Сірыі ў баі з амерыканцамі загінулі дзясяткі байцоў расійскай прыватнай вайсковай кампаніі

Дзясяткі байцоў расійскіх «прыватных вайсковых кампаній» загінулі пры сутыкненні з амерыканска-курдскімі сіламі ў Сірыі некалькі дзён таму. 

Пра гэта пішуць некалькі расійскіх телеграм-каналаў, у тым ліку WarGonzo і Directorate 4, якія дэталёва асвятляюць аперацыю ў Сірыі. Афіцыйна Масква пра гібель сваіх грамадзян не паведамляла.

Канал WarGonzo апублікаваў некалькі аўдыязапісаў, на якіх расійскія вайскоўцы распавядаюць аб тым, што здарылася. У аўдыя шмат лаянкі, даслоўна расшыфраваць іх немагчыма, але ў цэлым гаворка ідзе пра тое, што пры нейкім сутыкненні ў Сірыі загінулі больш за 200 чалавек.

«Былі піндосы [амерыканцы] … Спачатку артой [артылерыяй] накрылі, потым паднялі чатыры вяртушкі [верталёты] і ў карусель запусцілі з буйнакаліберных кулямётаў… У нашых, акрамя аўтаматаў, нічога не было. Наогул зладзілі там пекла. Піндосы пэўна і дакладна ведалі, што гэта мы ідзём, рускія, вось нашы ішлі завод адціскаць, а яны на гэтым заводзе сядзелі… Вельмі шмат хто знік без вестак».

На другім запісе голас кажа: «Браце, ну зірні. Там […] забітых — толькі 5-я рота. 2-ку практычна не зачапіла. Карацей, 5-ку ўсю знішчылі, іх раскачалі там авіяцыяй, вяртушкамі, артылерыяй, і курды з амерыканцамі на іх папёрлі, у пацаноў проста не было шанцаў, 5-ка легла амаль уся».

На трэцім запісе голас распавядае, што перад атакай амерыканцы паднялі свой сцяг і расстралялі калону, што рушыла на іх. Ён дзівуецца, «на што нашы спадзяваліся»: «Тыпу самі сыдуць? Злякаюцца?»

Чацвёрты голас паведамляе: «З тэхнікі, кажа, ацалеў адзін танк і адзін БРДМ, а ўсе астатнія «бардакі», усе астатнія танкі былі знішчаны ў першыя хвіліны бою адразу».

Канал Directorate 4 піша, што гібель расейцаў адбылася ў ходзе ўдару 8 лютага, калі «авіяцыя краін Захаду нанесла ўдар па сілах, якія атакавалі пазіцыі «Сірыйскіх дэмакратычных сіл» (СДС) у раёне населенага пункта Хашам». Аднак гэтая крыніца не прыводзіць канкрэтных лічбаў.

Бой ішоў за радовішча, якое стала цэллю ўрадавых войскаў. Магчыма, іх падтрымоўвала расійская прыватная вайсковая кампанія. 

«Усе бакі сыходзяцца ў тым, што ў выніку ўдару было забіта каля ста чалавек, — паведамляе Directorate 4. — Сярод іх як шараговыя салдаты, так і высокапастаўленыя афіцэры і брыгадны генерал Юсуф Айша Хайдэр… Акрамя непасрэдна вайскоўцаў сірыйскай арміі, у нападзе бралі ўдзел іранскія «Брыгады Фатыміюн» і прадстаўнікі расейскай прыватнай вайсковай кампаніі. З нагоды апошняй разгарэліся спрэчкі датычна таго, колькі менавіта расіян было забіта. Адны называюць лічбы (ад 15 да 50 адных толькі забітых), іншыя мераюць «КамАЗамі».

8 лютага афіцыйныя прэс-службы і СМІ публікавалі інфармацыю, згодна з якой амерыканскія сілы нанеслі артылерыйскія і авіяцыйныя ўдары па праўрадавых сілах і забілі больш за 100 чалавек. Кааліцыя назвала гэтыя дзеянні «самаабаронай». Паводле звестак амерыканцаў, у наступе бралі ўдзел каля 500 чалавек, якія былі спыненыя супольнымі дзеяннямі знішчальнікаў F-22 і F-15, а таксама дронаў MQ-9. Амерыканцы і іх саюзнікі страт не панеслі (толькі адзін курд быў паранены).

Пра тое, што забітых і параненых расіян — сотні, паведаміў і Ігар Стралкоў (Гіркін) — адзін з камандзіраў штурмавікоў, што ў 2014 годзе распачалі вайну ў Данбасе. «Для крамлёўскіх стратэгаў усе людзі — смецце», — рэзка дадае ён.

Гібель дзясяткаў вайскоўцаў на Еўфраце следам за збіццём расійскага штурмавіка, катастрофамі ў самой Расіі і выкрыццём карупцыйных сувязяў найбліжэйшага паплечніка Пуціна — негатыўны фон для прэзідэнцкіх выбараў у краіне, што адбудуцца ў сакавіку. Ніводзін рэальны апанент Пуціна на выбары не дапушчаны. У іх удзельнічаюць толькі спарынг-партнёры ад псеўдаапазіцыйных партый і груповак. 

Прыватныя вайсковыя кампаніі Расіі, у прыватнасці, «ЧВК Вагнера» выкарыстоўваюць былых вайскоўцаў. Многія лічаць, што яны ёсць закамуфляванай часткай сілаў бяспекі Расіі.

• 0
• 0
• 0
• 0
• 0
• 0
• 0
• 0