Журналіста «Радыё Свабода» Антона Трафімовіча забралі ў міліцыю, склалі пратакол за непадпарадкаванне
Журналіста «Радыё Свабода» сёньня зноў даставілі ў РУУС Заводзкага раёну ў Менску. На яго склалі адміністрацыйны пратакол за непадпарадкаваньне супрацоўнікам міліцыі, паведамляе сайт выдання.
15 ліпеня Антона Трафімовіча брутальна затрымалі ў цэнтры Менску пасьля заканчэньня стрыму ля Цэнтарвыбаркаму, дзе сабраліся прыхільнікі Віктара Бабарыкі і Валера Цапкалы. Невядомыя людзі ў цывільным зламалі яму нос пры затрыманьні.
На наступны дзень міліцыя патлумачыла, што журналіст аказваў супраціўленьне, а таму супраць яго прымянілі фізычную сілу.
Трафімовіч лічыць, што справа супраць яго цалкам выдуманая. Міліцыя такім чынам спрабуе апраўдаць свой гвалт.
Сёньня раніцай журналіст ехаў здымаць пабоі ў судмэдэкспэртызу. На вуліцы Кіжаватава да яго падышлі супрацоўнікі міліцыі, забралі тэлефон і зьвезьлі ў РУУС Заводзкага раёна.
«Мяне там яўна чакалі», — сказаў журналіст.
Ён патлумачыў, што раніцай яму званілі з Заводзкага РУУСу, прасілі, каб прыехаў на 10 хвілін. Але пра адміністрацыйны працэс інспэктар ня згадваў.
«Лічу, што мяне хацелі завабіць туды падманам», — сказаў Трафімовіч.
Журналіст «Свабоды» правёў каля дзвюх гадзінаў у міліцыі, ён адмовіўся даваць паказаньні і не падпісаў пратаколы.
«Сказалі, што павязуць у суд, але адпусьцілі без тлумачэньняў. — сказаў ён. — Я ўпэўнены, гэта проста яшчэ адна спроба застрашыць мяне і іншых журналістаў».
Антон Трафімовіч падаў заяву ў Сьледчы камітэт, просіць распачаць крымінальную справу па артыкуле 198 Крымінальнага кодэксу — перашкода прафэсійнай дзейнасьці журналіста.
«Беларускія ўлады перад выбарамі 9 жніўня спрабуюць спыніць нашу журналісцкую працу і перашкодзіць аўдыторыі атрымліваць доступ да надзейных навінаў», — заявіла выканаўца абавязкаў прэзыдэнта «Радыё Свабодная Эўропа»/»Радыё Свабода» Дэйзі Сындэлар пасьля шэрагу затрыманьняў журналістаў «Свабоды».
Цяпер чытаюць
Колькі беларусаў атрымалі польскае грамадзянства за апошні час. Лічбы ўражваюць8
Колькі беларусаў атрымалі польскае грамадзянства за апошні час. Лічбы ўражваюць
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек44
Каментары