У Смалявічах павязалі адзінаццацікласнікаў, якія вярталіся з рэпетыцыі вальса
Сёння ў Смалявічах супрацоўнікамі міліцыі быў затрыманы ўвесь адзінаццаты клас гімназіі, які гуртам вяртаўся цэнтральнай вуліцай з рэпетыцыі выпускнога вальса, паведамляе Ганна Севярынец.
Хлопчыкаў пасадзілі за краты, дзяўчат на лаўкі, пераганялі з буса ў бус, прывезлі ў РАУС, камандавалі стаць тварам да сцяны. Жанчына ў РАУС моцна здзівілася і спытала: «Нашто вы сюды дзяцей прывезлі?» І іх выпусцілі.
Адзін хлопчык сказаў: «А гэты бус я ведаю, ім выканкам яго выдзеліў, мы ў гэтым бусе на канцэрт з аркестрам два разы ездзілі».
Смалявіцкі дзіцячы аркестр — лаўрэат шматлікіх рэспубліканскіх і міжнародных конкурсаў, піша Ганна Севярынец.
Вядома, што бацькі ўжо хадзілі ў РАУС з нагоды затрымання дзяцей і ім там сказалі, нібыта дзеці лаяліся матам на міліцыянераў. Севярынец сцвярджае, што гэтыя дзеці не лаюцца матам.
«Гэта самы моцны клас у Смалявіцкім раёне, з шостага класа яны штогод станавіліся «Класам года» гімназіі, у іх пяць (!) чалавек ідуць на залаты медаль, тры чалавекі з класа з'яўляюцца дыпламантамі абласной навуковай канферэнцыі школьнікаў, тут вучацца шматразовыя пераможцы раённых і абласных алімпіяд па вучэбных прадметах, чэмпіёны «Што? Дзе? Калі?» і пераможцы музычных і спартовых спаборніцтваў. Гэта шчэ трэба было пастарацца нарвацца менавіта на гэты клас», — кажа педагог.
-
На Беласточчыне прайшоў фестываль беларускай традыцыі Soncahraj ФОТЫ
-
Жонка Аляксандра Мілінкевіча расказала пра ягоны стан: памяць захавалася, але з рухальным апаратам вялікія праблемы
-
«Я ў калоніі быў больш вольны». Былы палітвязень Тамаз Піпія расказаў пра 6 гадоў за кратамі і новую паранаідальную беларускую рэальнасць
Каментары