Жыхару Віцебска, які на акцыі «размахваў дубінкай» і «схапіў за рукі» сілавіка, далі 2 гады
Суд Кастрычніцкага раёна Віцебска 16 снежня прысудзіў 27-гадовага разбяра па дрэве Уладзіслава Макавецкага, якога абвінавачвалі ў гвалце або пагрозе гвалту ў дачыненні да супрацоўнікаў міліцыі, да 2 гадоў калоніі агульнага рэжыму, піша Tut.by.
Працэс вяла суддзя Сняжана Кіндзеева. Пракурор у судовых спрэчках настойваў на тым, што падчас несанкцыянаванага вулічнага шэсця ў Віцебску 6 верасня Уладзіслаў Макавецкі падабраў гумовую дубінку і мэтанакіравана размахваў ёю ў бок міліцыянера Аляксандра Пятроўскага, схапіў яго за рукі і прычыніў яму фізічны боль, а таксама вусна пагражаў яму.
Дзяржабвінаваўца запатрабаваў для маладога чалавека 3 гады калоніі. Яму ў выніку далі два гады.
Адвакат Уладзіслава Макавецкага заявіла, што віну яе падабароннага судовае следства не даказала і што ў яго дзеяннях няма складу злачынства. Абвінавачванне не знайшло сведак, якія пацвердзілі б, што Макавецкі пагражаў міліцыянтам.
У апошнім слове Уладзіслаў Макавецкі адзначыў, што не прычыніў нікому шкоды.
Пацярпелыя міліцыянты — малодшы сяржант Аляксандр Пятроўскі і старшы сяржант Дзмітрый Фядотаў — запатрабавалі кампенсацыю маральнай шкоды (адпаведна 500 і 200 рублёў). Гэтыя грошы яны ўжо атрымалі.
Гэта ўжо чацвёрты працэс у Віцебску па крымінальных справах, заведзеных супраць удзельнікаў вулічных мітынгаў, абвінавачаных у гвалце ў дачыненні да супрацоўнікаў міліцыі і службовых асоб (артыкулы 364 і 366 КК).
Да 2,5 года калоніі прысудзілі праграміста Аляксандра Кірыленку, рамесніка Андрэя Цімафеенку — да 2 гадоў калоніі. Самы суровы прысуд у Алега Яфрэменкі — 4,5 года пазбаўлення волі
Цяпер чытаюць
«Лукашэнка проста не ведае». Ябацьку, які выкладаў у тыкток відэа пра булінг дачкі, пасадзілі на паўтара месяца4
Каментары