Былы міністр інфармацыі і дэпутат Палаты прадстаўнікоў Лілія Ананіч можа ўзначаліць камісію па выяўленні прыкмет экстрэмізму ў інфармацыйнай прадукцыі. Адпаведная пастанова апублікавана сёння на Нацыянальным прававым інтэрнэт-партале, піша Tut.by.
Дакумент зацвярджае новы склад Рэспубліканскай экспертнай камісіі па ацэнцы інфармацыйнай прадукцыі на прадмет наяўнасці (адсутнасці) у ёй прыкмет праявы экстрэмізму. Раней у складзе было 23 чалавекі, цяпер — 20.
Камісію раней узначальвала дырэктар дзяржаўнай установы «Нацыянальная кніжная палата Беларусі» Алена Іванова. Зараз старшынёй камісіі прызначаная Лілія Ананіч. У дакуменце ёсць заўвага — «з яе згоды».
Гэта значыць Лілія Ананіч можа пагадзіцца, альбо адмовіцца ўзначаліць камісію.
Намеснікам старшыні Рэспубліканскай экспертнай камісіі па-ранейшаму застанецца намеснік міністра інфармацыі Ігар Бузоўскі, а сакратаром — кансультант упраўлення выдавецкай і паліграфічнай дзейнасці Міністэрства інфармацыі Алена Аношка.
У склад камісіі таксама ўваходзяць прадстаўнікі навуковай супольнасці з НАН Беларусі і ВНУ краіны — дактары і кандыдаты сацыялагічных, гістарычных, філасофскіх і філалагічных навук. А акрамя таго — прадстаўнікі сілавых ведамстваў. Напрыклад, намеснік начальніка Галоўнага ўпраўлення КДБ Ігар Жукаў, галоўны спецыяліст аддзела інфармацыі і прапаганды ўпраўлення ідэалагічнай работы Дзяржпагранкамітэта Сяргей Касачук, начальнік чацвёртага аддзела трэцяга ўпраўлення ГУБАЗіК МУС Юрый Ткачук, намеснік начальніка другога аддзела чацвёртага упраўлення ГУБАЗіК МУС Дзмітрый Юцоў, прадстаўнік СК Сяргей Кабаковіч і прадстаўнік ДМК Кацярына Шкурдзюк.
Нагадаем, Рэспубліканская экспертная камісія па ацэнцы інфармацыйнай прадукцыі на прадмет наяўнасці (адсутнасці) у ёй прыкмет праявы экстрэмізму была створана ў 2014 годзе пры Мінінфарме. Менавіта на падставе рашэння гэтай камісіі ў 2020 годзе два тэлеграм-каналы былі прызнаныя судом экстрэмісцкімі матэрыяламі.
Лілія Ананіч з 2014 па 2017 год была міністрам інфармацыі ў Беларусі. У цяперашні час з'яўляецца дэпутатам Палаты прадстаўнікоў сёмага склікання. Разам з іншымі дэпутатамі яна займаецца распрацоўкай законапраекта аб недапушчэнні гераізацыі нацызму.
Каментары