«Хочацца, каб героі пакалення былі разумнымі людзьмі». Трэвэл-журналіст Лёня Пашкоўскі абурыўся новым кліпам Макса Каржа пра Афганістан
Следам за новым альбомам рэпер Макс Корж выпусціў кліп на адну з песень рэлізу — «Афган». У ім можна пабачыць кадры з вандроўкі музыкі ў Афганістан напярэдадні прыходу да ўлады талібаў. Асноўны кантэнт здымаўся на тэрыторыі Кабула і Панджшэра.
«Нават не ведаю, што больш недарэчна: такі кліп на фоне бягучай павесткі ці той, што быў выпушчаны адразу пасля беларускіх пратэстаў»
Пры ўсёй трагічнасці сённяшніх падзей у краіне тэкставым суправаджэннем да відэашэрагу стаў аповед лірычнага героя, сэрца якога разбівае каханне. І пачуцці ў яго дымяць, «як Афган». Такое спалучэнне тэксту і карцінкі выклікала пытанні ў беларускага трэвэл-журналіста Лёні Пашкоўскага, які сам не так даўно наведаў Афганістан і прывёз адтуль некалькі выпускаў для відэаблога пра жыццё і страхі мясцовага насельніцтва.
«Афганістан — гэта краіна, дзе дзяўчынак у 13 гадоў аддаюць замуж за пяцідзесяцігадовых; удовы павінны выходзіць замуж за братоў сваіх мужоў; працаваць сярод мужчын ім нельга, і ўвогуле працаваць і выходзіць з дому непажадана; танчыць, катацца на ровары і займацца спортам забаронена; у школу хадзіць таксама непажадана, калі там вывучаюць нешта, апроч Карана. І далей па спісе — мы пра гэта шмат чулі за апошнія месяцы. А Макс, відаць, не чуў (ці ў Afghanistan Times не пісалі).
І каб адпомсціць лірычнай гераіні, Макс ладзіць ў гэтай краіне мужчынам максімальна пацанскі варушняк з танцамі з калашнікавым, курэннем гашышу, дрыфтам. А потым яшчэ і тачку падрывае дзеля задавальнення, таму што можа, і таму што гэта ж самая вясёлая пацанская краіна ў свеце! Краіна, у якой машыны звычайна падрываюць, каб забіць болей нявінных людзей. Дзе ў маі гэтага года машыну падарвалі каля жаночай школы ў Кабуле, забіўшы некалькі дзясяткаў дзяўчынак.
І вось на фоне ўсяго гэтага лірычны герой песні кажа: «Няма ні сілы, ні абароны ад праблемы праз жанчыну». Я нават не ведаю, што больш недарэчна і амаральна: такі кліп на фоне бягучай павесткі ці той, што быў выпушчаны адразу пасля беларускіх пратэстаў (памятаеце ж багажнік руж?)», — абураецца Лёня Пашкоўскі і ў канцы дадае, што, напэўна, не зразумеў, што хацеў сказаць аўтар, і што хоча, каб героі пакалення былі разумнымі людзьмі, а сотні тысяч слухачоў «фапалі» на нешта апроч танцаў з аўтаматамі.
У каментарыях многія людзі падтрымалі меркаванне Лёні, але прыхільнікі творчасці Каржа абараняюць куміра.
Раней Макс Корж у сацсетках тлумачыў, чаму ўвогуле паехаў у Афганістан, наступным чынам: «Я не з'ехаў шукаць натхнення, таму што натхненне для мяне — гэта вы. Проста кожнаму чалавеку часам трэба разумець, што сапраўды важна, а што — дробязі».
Варта адзначыць, што новы альбом Макса Каржа пад назвай «Псіхі трапляюць у топ» з моманту прэзентацыі трымаецца ў топе Яндэкс.Музыкі і Apple Music.
Цяпер чытаюць
Дзмітрый Семчанка: Я прыйшоў у пул Лукашэнкі біцца з Расіяй21
Каментары