Мінархітэктуры ўносіць змены ў парадак грамадскіх абмеркаванняў па пытаннях архітэктурнай і будаўнічай дзейнасці.
Абмеркаванне праекта адпаведнай пастановы Саўміна праходзіць на прававым форуме да 3 студзеня. Але замест таго, каб спрасціць і пашырыць працэдуру ўзгаднення праектаў з меркаваннямі неабыякавых людзей, дзяржава, наадварот, імкнецца зрабіць магчымы ўдзел грамадства ў абмеркаванні важных для яго пытанняў мінімальным, пішуць СН-плюс.
Каардынатар Таварыства «Горад для гараджан» Дзяніс Кобрусеў, каментуючы праект Мінархітэктуры для СН-плюс, кажа, што праект пастановы не прадугледжвае кардынальных зменаў: істотна нічога не паляпшаецца, але і не пагаршаецца.
Але выклікае занепакоенасць, тое, што падчас экспазіцыі і прэзентацыі праектаў удзельнікам абмеркаванняў не могуць давацца дакументы з грыфам «Для службовага карыстання». З увядзеннем гэтай нормы у чыноўнікаў будзе спакуса адвольна накладваць грыф ДСК на любыя матэрыялы праектаў.
Зрэшты, адзначае Кобрусеў, практыка ўтойвання важнай для слуханняў інфармацыі назіралася і раней. Але калі раней гэта было нефармальна, то цяпер можа быць узаконена.
Да таго ж грамадзяне мусяць фактычна станавіцца архітэктарамі, каб падаць свае прапановы да праектаў. Бо ўсе заявы і прапановы неабходна справаджаць спасылкамі на тэхнічна-нарматыўныя акты і нормы.
Такая практыка — ненармальная, не адпаведная еўрапейскім нормам, — адзначае Дзяніс Кобрусеў.
Мінархітэктуры прапануе
Праводзіць наступныя абмеркаванні:
- горадабудаўнічых праектаў агульнага планавання;
- горадабудаўнічых праектаў спецыяльнага планавання;
- горадабудаўнічых праектаў дэталёвага планавання;
- архітэктурна-планіровачных канцэпцый аб’ектаў будаўніцтва (пры адсутнасці праектаў агульнага і дэталёвага планавання).
Пры гэтым схемы комплекснай тэрытарыяльнай арганізацыі на ўзроўні краіны, абласцей і раёнаў на абмеркаванні выносіцца не будуць.
Прадстаўленне праектаў плануецца працягваць 15 дзён, як і само абмеркаванне 25 дзён.
Заўвагі і прапановы ўдзельнікаў у пісьмовай і электроннай форме павінны накіроўвацца архітэктурна-горадабудаўнічым саветам на працягу 3 дзен пасля заканчэння абмеркавання.
Членам савета таксама даецца 3 дні на разгляд заўваг і прапаноў.
Архітэктурна-горадабудаўнічы савет цягам 5 дзён з дня атрымання пазіцыі членаў разглядае яе і ў выпадку адсутнасці заўваг рыхтуе пратакол падвядзення вынікаў грамадскага абмеркавання, складае пратакол разгляду заўваг і прапаноў удзельнікаў.
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары