Відэа, як маленькая ўкраінка спявае ў сховішчы, стала вірусным. Вось што цяпер з дзяўчынкай
На мінулым тыдні ў сеціве з’явіўся кранальны відэазапіс, зроблены ў адным з кіеўскіх бамбасховішчаў. На ім маленькая дзяўчынка Амелія спявае на рускай мове песню Let it go з мультфільма «Халоднае сэрца».
Запіс разышоўся па замежных СМІ і хутка стаў вірусным. Напрыклад, на ютуб-канале брытанскага медыя Independent выступ Амеліі цяпер мае 194 тысячы праглядаў, у іх канкурэнта Telegraph — 123 тысячы праглядаў. Нават костарыканскае выданне La Nacion звярнула ўвагу на маленькую ўкраінку: запіс з яе спевамі мае на канале выдання 30 тысяч праглядаў.
Марта Смехава, аўтарка запісу, распавяла пра тое, як ён быў зроблены. Як кажа Смехава, яна прапанавала дзецям у бамбасховішчы зрабіць маленькую выставу іх малюнкаў, каб трохі ўпрыгожыць сцены. Сярод дзяцей асабліва выдзялялася адна маленькая гаваркая дзяўчынка: «Яна распавяла мне, што, акрамя малявання, любіць спяваць, і падзялілася сваёй марай выступіць на вялікай сцэне перад публікай. Я прапанавала ёй: «Бачыш, малышка, як шмат тут людзей? Спявай!»
Выступ Амеліі паказвае, супраць каго ва Украіне ваююць расійскія салдаты. Разам з тым радасна, што дзяўчынка цяпер апынулася ў бяспецы. Амелія здолела выехаць у Польшчу, дзе яна знаходзіцца са сваёй бабуляй.
Маленькая ўкраінка дала інтэрв’ю ВВС. Акрамя іншага, яна распавяла, што ў сховішчы было «нармальна», бо там былі і іншыя дзеці. Яна дадала, што была б рада зноў апынуцца ў Кіеве са сваімі бацькамі.
Дзяўчынка падзякавала мільёнам людзей ва ўсім свеце, хто глядзеў яе выступ, і распавяла, што кожны дзень практыкуецца ў спевах.
Каментары