«Доказаў дастаткова». Украінская пракуратура пра датычнасць жыхара Мазыра да забойстваў у Бучы
Выданне Zerkalo.io звярнулася ва ўкраінскую пракуратуру, каб удакладніць, ці сапраўды Калацэй датычны да забойстваў мірных жыхароў у Бучы, што пад Кіевам.
У нас дастаткова доказаў для таго, каб падазраваць гэтую асобу ў інкрымінаваных ёй злачынствах. Дасудовае расследаванне працягваецца, — растлумачылі ў прэс-службе пракуратуры Кіеўскай вобласці. — Разгалошванне іншых звестак, згодна з арт. 222 КПК Украіны, немагчымае, паколькі гэта можа нашкодзіць следству».
Яшчэ Zerkalo.io спрабавала ўдакладніць у пракуратуры Кіеўскай вобласці, чаму, калі расследаванне яшчэ працягваецца, імя падазраванага было названае. Адказ на пытанне ім параілі шукаць у брыфінгу генеральнага пракурора Украіны Ірыны Венедыктавай, які прайшоў 4 траўня. Вось як яна патлумачыла тое, што адбылося:
«Мы будзем іх паказваць. Калі мы разумеем, што правялі ўсе неабходныя працэсуальна-следчыя дзеянні і ў нас ёсць усе законныя і абгрунтаваныя падставы пачынаць падазраваць канкрэтных расійскіх вайскоўцаў, якія тут забівалі, катавалі, гвалтавалі, мы будзем абавязкова апублічваць іх фота і звесткі, каб іншыя ахвяры, якія, не дай Бог, таксама былі ў іх лапах, маглі нам [пра гэта] паведамляць.
Гэта з аднаго боку. А з другога, няхай гэтыя нелюдзі і іншыя, якія цяпер ваююць у іншых частках нашай краіны, ведаюць, што мы кожнага высветлім, віну кожнага дакажам і будзем прыцягваць кожнага да адказнасці. Таму што асноўнае, што робіць іх такімі жорсткімі, гэта беспакаранасць. А беспакаранасці не можа быць у сучасным свеце».
Падчас прэс-канферэнцыі генеральнага пракурора таксама папрасілі пракаментаваць сітуацыю з падазрэннем, якое было выстаўлена ўраджэнцу Мазыра.
«Мы выдатна разумелі, хто ў нас будзе гэты падазраваны, — адказала Ірына Венедыктава. — Мы вельмі старанна да гэтага падыходзілі. Так, у яго такое грамадзянства, што ж з гэтым зробіш. Але, у прынцыпе, гэта ж не пытанне, хто ў войску краіны-агрэсара, з якім грамадзянствам ваюе. Гэта пытанне да краіны-агрэсара. Да нас пытанне, ці ёсць у нас дастаткова доказаў, што гэты чалавек, з'яўляючыся вайскоўцам Расійскай Федэрацыі, забіваў (у нас ёсць законныя і аргументаваныя падставы лічыць, што ён забіў чатырох чалавек і катаваў як мінімум аднаго чалавека).
У нас, дзякуй богу, ёсць людзі, якія могуць даваць паказанні. Таму ў гэтым выпадку грамадзянства Беларусі… Ну што ж, такое таксама бывае. Але гэта не азначае, што мы не будзем працягваць прыцягваць да адказнасці».
Нагадаем, што генеральны пракурор Украіны 2 траўня агучыла імя першага падазраванага ў забойствах у Бучы — ім аказаўся ўраджэнец Мазыра Сяргей Калацэй. Сам ён адмаўляе віну, як і той факт, што ў апошні час наведваў Украіну. Па словах Калацэя, ён мае толькі беларускі пашпарт і сам цяпер знаходзіцца ў Беларусі.
Чытайце таксама:
Сяргей Калацэй, абвінавачаны ў злачынствах у Бучы, патлумачыў сітуацыю ў Instagram
Першы абвінавачаны ў забойствах у Бучы беларус? Можа быць памылка: гэты чалавек двойчы судзімы
Першы падазраваны з Бучы — грамадзянін Беларусі?
Двайнікі вядомых беларусаў. І не кажыце, што не задумваліся пра іх падабенства12
Каментары