Азаронак патрабуе зачыніць мінскі бар «Каліноўскі» — нібыта праз нацыянальны канфлікт. Расказваем
Заўвага ў сацсетках прыцягнула ўвагу дзяржаўных прапагандыстаў да бара «Каліноўскі». Цяпер яны патрабуюць закрыцця «русафобскай забягалаўкі».
«Вось у гэтую ўстанову ў горадзе Мінску нас не пусцілі па нацыянальнай прыкмеце», — падпісаў ролік у Тыктоку Нурлан Сафараліеў, адзначыўшы, што ахоўнік пагражае і груба сябе паводзіць.
Вот Вам и толерантность о которой все кричат)
Сафараліеў — азербайджанец, які жыве ў Мінску. Скончыў факультэт міжнародных адносін БДУ, цяпер, як пазначае сам Нурлан, «ІТ-распрацоўшчык на фрылансе, перакладчык і трэнер па боксе». У яго сацсетках лезгінка, фота з кальянам і «глыбокія думкі».
Днямі Сафараліеў з сябрамі хацеў наведаць бар «Каліноўскі» на Зыбіцкай. Не ўдалося — ахоўнік Нурлана ўнутр не пусціў. Хлопец пакрыўдзіўся на гэта ў сацсетках, дадаўшы, што прычынай нібыта стала яго нацыянальнасць.
Шчыра кажучы, з кароткага відэа Нурлана незразумела, у чым быў канфлікт паміж кампаніяй Сафараліева і аховай. Праўда, чуваць, як ахоўнік абяцае засунуць «кудысьці» хлопцу яго тэлефон.
Дык а што здарылася?
Дазваніўшыся па адным з нумароў, пазначаных як кантакты бара «Каліноўскі», карэспандэнт «Нашай Нівы» папрасіў прадстаўнікоў бара пракаментаваць гісторыю. Суразмоўца папрасіў звязацца з ім пазней, пасля чаго перастаў выходзіць на сувязь.
Але ж у той жа вечар у інстаграме бара «Каліноўскі» з’явіўся пост з выбачэннямі. Паводле яго, ахоўнік быў звольнены.
«Наша Ніва» звязалася з Сафараліевым і яго сябрам, каб пачуць іх версію падзей. Хлопцы сказалі, што пакуль не гатовыя даваць каментары. Адзначылі толькі, што не хацелі б нейкіх негатыўных наступстваў для бара і яго работнікаў.
Вось толькі выглядае, што негатыўныя наступствы ўжо не спыніць. Бо Азаронак і іншыя прапагандысты схапіліся на гэтую гісторыю. Патрабуюць, як звычайна, закрыцця і арыштаў.
«Беларусы не маюць намеру трываць нацыяналістычную, антыпрэзідэнцкую, русафобскую забягалаўку і чакаць «піўнога путчу». Моладзевы парламент адправіў афіцыйны зварот адказным таварышам з патрабаваннем неадкладна закрыць гэтую дрэнь.
А кіраўнікі любімай установы Матолькі, якія праводзяць палітыку дыскрымінацыі па нацыянальнай прыкмеце, на мой погляд, добра б глядзеліся на фоне дзвярэй, — напісаў у сваім канале Азаронак, намякаючы на «пакаяльны кабінет» палітычнай паліцыі. —
Улічваючы грамадскую значнасць, спадзяюся, што папяровай цяганіны і бюракратыі не будзе».
Да ўпаўнаважанага па справах рэлігій і нацыянальнасцяў імгненна адправілі ліст з БРСМ! Чаго просяць? Таксама закрыць бар.
Тут варта адзначыць, што «Каліноўскі» — тыповая ўстанова сталічнай тусовачнай вуліцы Зыбіцкай. Кактэйлі, папса, танцы. Так, спачатку сацсеткі бара вяліся на беларускай, праводзіліся цікавыя піяр-акцыі, напрыклад, «Каліноўскі» разам з выдавецтвам «Галіяфы» запрашаў прыдумаць рэцэпт кактэйля, які згадваецца ў кнізе Кірыла Стаселькі.
Але ўжо даўно і сацсеткі русіфікаваліся, і пра беларушчыну ў «Каліноўскім» нагадвае толькі назва. Будзем шчырымі: калі б бар сапраўды неяк прасоўваў беларускасць, у сённяшнія людажорныя часы ўлады яго б даўно закрылі. Нават у відэа Сафараліева чуваць, як у бары гучна грае песня Маргенштэрна пра «Кадзілак».
Вось толькі лукашэнкаўскіх прапагандыстаў ужо не спыніць. Яны накінуліся на бар — і выглядае, што для нянавісці ім ужо дастаткова якраз толькі беларускай назвы.
«Гістарычны персанаж заклікаў у сваіх пракламацыях «вешаць маскальскіх папоў», нацысцкія штурмавікі з батальёна ягонага імя пагражаюць зладзіць вайну ў Беларусі, а кіраўніцтва бара, названага ў гонар гэтага персанажа, выкідвае людзей «не той знешнасці». Пры гэтым ахоўнікі паводзяць сябе не лепш за польскіх шляхціцаў — вядомых быдлякоў (чытай «Тараса Бульбу»), — піша Азаронак. —
Вядома, што дадзеная ўстанова была «культавай» ва ўсіх тых, каго цяпер прызналі экстрэмістамі і тэрарыстамі.
Дакуль?»
Нагадаем, што ў 2019-м на пахаванне парэшткаў Каліноўскага ў Вільні ездзіла афіцыйная беларуская дэлегацыя на чале з віцэ-прэм’ерам Ігарам Петрышэнкам.
Тым часам учора з бара прыбралі шыльду з назвай «Каліноўскі».
Каментары