«Цяжка ўявіць, каб буйныя кампаніі перавозілі сотні ці мільёны даляраў гатоўкай». Эканаміст — пра новае рашэнне ўладаў па валюце
Урад і Нацбанк дазволілі беларускім юрыдычным асобам прымаць наяўную валюту ад замежных партнёраў. Меру, да якой давялося прыйсці з-за санкцый, называюць часовай. Яна будзе дзейнічаць да канца 2023 года. Што гэта дасць?
Эксперт BEROC Анастасія Лузгіна адзначае, што гэтае рашэнне хутчэй накіраванае на падтрымку дробнага і сярэдняга бізнэсу, чым на вялікіх гульцоў рынку.
Эксперт BEROC Анастасія Лузгіна
«Звычайна Цэнтральны банк імкнецца максімальна скараціць наяўны абарот, паколькі пры такім разліку заўсёды больш рызык, звязаных з шэрымі схемамі і ўхіленнем ад выплаты падаткаў.
Але ў сітуацыі, калі ўсё больш беларускіх банкаў застаюцца адключанымі ад SWIFT, а Польшча ў наступным пакеце санкцый прапануе адключыць ад сістэмы ўсе беларускія банкі, даводзіцца знаходзіць абходныя шляхі. Таму гэтая мера накіраваная на тое, каб хоць неяк нівеляваць наяўныя праблемы з міжнароднымі разлікамі», — адзначае эканамістка.
Калі гаворка ідзе пра сумы ў тысячы або дзясяткі тысяч даляраў, такі працэс разліку цалкам можа быць выкарыстаны.
«Але ў той жа час цяжка ўявіць, каб буйныя кампаніі перавозілі сотні ці мільёны даляраў гатоўкай, каб разлічыцца з нейкай беларускай арганізацыяй. На гэта мала хто пойдзе», — лічыць эксперт.
Пры гэтым пераход на наяўныя разлікі прыносіць з сабой не толькі шэраг плюсаў для бізнэсу і дзяржавы, але і новыя рызыкі.
«Узнікаюць банальныя рызыкі ў выглядзе таго, што трэба перасоўвацца з буйнымі сумамі наяўных сродкаў. Для дзяржавы таксама не ўсё так вясёлкава. У законе прапісана, што правядзенне наяўных разлікаў у валюце за тавары і паслугі павінна суправаджацца абавязковым забеспячэннем залічэння атрыманых сродкаў на банкаўскія рахункі ў Беларусі, але на справе ствараецца больш магчымасцяў сыходу ад выплаты падаткаў, выкарыстання шэрых схем», — звяртае ўвагу экспертка.
Наколькі эфектыўнай акажацца гэтая мера, пакуль разважаць складана, але нават на цяперашнім этапе становіцца ясна, што для буйнога бізнэсу з вялікімі сумамі кантрактаў прынятае рашэнне вялікай ролі не грае.
Цяпер чытаюць
Для каго сабраліся будаваць велізарны вантавы мост у Мінску?3
Каментары