У арт-кавярні «Добрыя мысьлі» разгарнулася выстава Алеся Шатэрніка «Беларусь Сьвятая». Нягледзячы на прэтэнцыёзны назоў, гэта вельмі яркая, лёгкая й сьветлая экспазыцыя. Тыя, хто ведае даробак Шатэрніка як грунтоўнага майстра-скульптара, будуць шчыра зьдзіўленыя амаль бязважкай, празрыстай часткай ягонае творчасьці.
У арт-кавярні «Добрыя мысьлі» разгарнулася выстава Алеся Шатэрніка «Беларусь Сьвятая». Нягледзячы на прэтэнцыёзны назоў, гэта вельмі яркая, лёгкая й сьветлая экспазыцыя. Тыя, хто ведае даробак Шатэрніка як грунтоўнага майстра-скульптара, будуць шчыра зьдзіўленыя амаль бязважкай, празрыстай часткай ягонае творчасьці.
Таленавіты чалавек – таленавіты ва ўсім. Мы ведаем Шатэрніка-паэта, Шатэрніка-публіцыста, Шатэрніка – грамадзкага дзеяча. Цяпер, высьветлілася, ён яшчэ й жывапісец. Апошняе дзесяцігодзьдзе майстар нястомна экспэрымэнтуе ў гэтым жанры. Яго можна ўбачыць і з эцюднікам у палях вакол Блакітных азёраў, і за варштатам у ягонай майстэрні. Лёгкія жывапісныя імпрэсіі мастака вяртаюць нам першародны сэнс мастацтва – проста распавесьці пра сьвет наш уласнымі сродкамі. І сьвет Шатэрніка захапляе сваё непасрэднасьцю, шчырасьцю й нязмушанасьцю. Без настаўленьняў, маніфэстаў і патэтыкі.
Хоць без патэтыкі не абышлося. Выставу «Беларусь Сьвятая» адкрывае вялікае палатно «Ўсяслаў Полацкі», на якім князь-чарадзей прадстаўлены вершнікам-волатам між блакітных даляглядаў, у смузе якіх лунаюць бел-чырвона-белыя сьцягі. Вось тут і згадваеш, што маэстра перадусім скульптар. І конны партрэт легендарнага князя выглядае найперш як жывапісны эскіз таго самага славутага ўжо помніка, што Алесь Шатэрнік прапануе Полацку. І ў гэткім выкананьні вобраз полацкага князя глядзіцца ня горш.
Мастак лёгка й нязмушана піша інтэр’еры сьвятыняў, ненатужна выпісваючы няпростыя пэрспэктывы архітэктурных дэталяў. Досьвед адмыслоўца-інтэр’ершчыка тут надаецца яму як найлепей.
Таксама на выставе прадстаўлены тузін размаітых краявідаў, кожны зь якіх ёсьць часьцінаю аўтарскае біяграфіі, пра што Шатэрнік можа распавядаць ва ўласьцівай яму захапляльнай манеры. І гэтае захапленьне міжволі перадаецца гледачу. Але захапленьне, бадай, не ад прыватных расповедаў, а ад чысьціні звонкіх фарбаў, якімі апэруе мастак. На палотнах перад намі паўстае ягоная Беларусь. Напрадвесьні і ў шыкоўным восеньскім буцьвеньні, у смузе адліжнай шарай гадзіны і ў пярэстым зіхаценьні мільёнаў нашых красак.
❏
Выставу можна ўбачыць па адрасе: кавярня «Фальварак «Добрыя мысьлі»» (Магілёўская, 12). Праезд да ст. м. «Інстытут культуры».
Цяпер чытаюць
Лукашэнка знайшоў незвычайныя словы для спачування Хаменеі: «вераломная атака»23
Каментары