У памерлага ў палоне ў «ДНР» брытанца быў дыябет, яму маглі не аказваць дапамогі
Сям'я брытанца Пола Уры, які памёр у палоне ў непрызнанай «ДНР», абвінаваціла ў яго смерці ўрад Расіі і тых, хто непасрэдна трымаў яго ў зняволенні. Іх падазраюць у неаказанні яму медыцынскай дапамогі, піша «Бі-бі-сі».
Па словах сваякоў брытанца, ім дакладна вядома, што ў момант затрымання ў Пола пры сабе быў інсулін, бо ён хварэў на дыябет 1-га тыпу. Улады «ДНР» не маглі не ведаць, што гэта за сродак і пры якім дыягназе яго прапісваюць.
Таксама да палоннага адмаўляліся пускаць прадстаўнікоў Чырвонага Крыжа і іншых міжнародных гуманітарных арганізацый, якія некалькі разоў хацелі праверыць, у якіх умовах утрымліваюцца брытанцы.
Гэта гаворыць толькі пра тое, лічыць сям'я, што ўмовы былі жудаснымі, і дээнэраўцы не хацелі, каб пра гэта даведаліся.
Прарасійскія ўлады самаабвешчанага ўтварэння абвінавацілі ў смерці брытанца ўрад Брытаніі, які нібыта адмовіўся весці перамовы пра лёс свайго грамадзяніна і не забяспечыў яму медыцынскую дапамогу. Аднак
сваякі Пола Уры адкінулі гэтыя заявы, расказаўшы брытанскай прэсе, што ўлады ў Лондане сумесна з Чырвоным Крыжом рабілі ўсё магчымае, але іх неаднаразовыя запыты не задавальняліся.
Цяпер сям'я хоча вярнуць цела Уры ў Брытанію, аднак праваабаронцы лічаць, што шанцаў на гэта мала. Яны маюць намер прасіць брытанскі ўрад падключыцца да перамоваў аб выдачы цела.
У гэтым выпадку з дапамогай судмедэкспертызы ў Брытаніі можна было б дакладна вызначыць прычыны смерці Уры. Сваякі падазраюць, што яго маглі катаваць, хоць незалежных пацвярджэнняў іх здагадак няма. Менавіта гэта можа быць галоўнай прычынай нежадання «ДНР» вярнуць цела родным.
45-гадовы брытанскі валанцёр з некамерцыйнай арганізацыі Presidium Network быў захоплены расійскімі вайскоўцамі 25 красавіка на адным з блокпастоў на поўдні Украіны.
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1919
Каментары