Паплечніца венгерскага прэм'ера Орбана сышла ў адстаўку праз яго «нацысцкую» заяву аб расах
Даўняя паплечніца і дарадца прэм'ер-міністра Венгрыі Віктара Орбана сышла ў адстаўку, заявіўшы, што яго словы пра непрымальнасць змешвання еўрапейцаў з іншымі расамі — гэта «чыста нацысцкая прамова», піша «Бі-бі-сі».
«Я не разумею, як вы не заўважылі, што ваша прамова — гэта чыста нацысцкая дыятрыба, годная Ёзэфа Гебельса», — так Жужа Хегедус патлумачыла свой крок у лісце Орбану аб адстаўцы.
Жужа Хегедус знаёмая з Орбанам 20 гадоў, а венгерскі прэм'ер вядомы сваімі антымігранцкімі поглядамі, але прамоўленыя ў суботу словы пра змешванне рас здаліся занадта скандальнымі нават даўняй паплечніцы.
Орбан казаў пра расавае пытанне ў суботу на захадзе Румыніі, у рэгіёне, населеным венграмі. Ён сказаў, што народы Еўропы могуць і хочуць змешвацца адзін з адным, але не павінны змешвацца з нееўрапейцамі.
«Мы хочам змешвацца адзін з адным, але мы не хочам станавіцца народамі змяшанай расы», — сказаў прэм'ер.
Міжнародны камітэт вязняў Аўшвіца назваў прамову Орбана «дурной і небяспечнай», а вядучая арганізацыя яўрэяў Венгрыі таксама асудзіла гэта заяву.
Віктар Орбан, адказваючы сваёй мінулай паплечніцы, сказаў, што яна дарма падазрае яго ў «нацызме». «Ты ведаеш лепш за каго б ні было, што мой урад у Венгрыі вядзе палітыку нулявой цярпімасці ў дачыненні да і антысемітызму і расізму», — напісаў ён у адказе Жужы Хегедус.
Прэс-сакратар Орбана Золтан Ковач заявіў, што прэса раздзьмула скандал вакол «пары жорсткіх радкоў аб іміграцыі і асіміляцыі», праігнараваўшы пры гэтым асноўныя тэзісы той прамовы. Віктар Орбан у суботу казаў у ліку іншага пра вайну ва Украіне — і даводзіў, што падтрымка Захаду Украіне не дапамагае, што санкцыі супраць Расіі не працуюць, і што трэба хутчэй заключыць мір.
Цяпер чытаюць
Выхадцы з «Альфа» КДБ Беларусі займаюць кіраўнічыя пасады ў новым расійскім суперсакрэтным спецпадраздзяленні, прызначаным для забойстваў за мяжою14
Каментары