Майстра па дрэве і шматдзетнага бацьку з Бабруйска асудзілі за рэабілітацыю нацызму
Вячаслаў Міхалап з Бабруйска займаецца аздабленнем драўляных дамоў і мае свой невялікі бізнэс. У жніўні мінулага года яго арыштавалі. Пасля мужчыну пасадзілі ў СІЗА і асудзілі за рэабілітацыю нацызму.
Вячаславу Міхалапу 38 гадоў. У Бабруйску ён працаваў як індывідуальны прадпрымальнік. Яго кампанія, створаная ў 2022 годзе, спецыялізавалася на аздабленні драўляных дамоў са зруба і бруса: прафесійнай шліфоўцы, фарбаванні і герметызацыі па тэхналогіі «цёплае шво». У яго брыгадзе працуюць тры чалавекі.
У Вячаслава ёсць жонка і трое дзяцей.
У жніўні 2025‑га пра Міхалапа пісаў канал Следчага камітэта. У сюжэце яго называюць скінхэдам:
«Яшчэ з падлеткавага ўзросту мужчына праяўляў інтарэс да гісторыі неанацызму, быў уцягнуты ў субкультуру скінхэдаў і раней ужо меў судзімасць за групавое хуліганства ў дачыненні да незнаёмцаў». Сцвярджалася, што ён «прышчапляў свае погляды 7‑гадоваму сыну».
Вячаслаў раней быў удзельнікам ультраправых тэлеграм-чатаў. Пра сябе ён некалі пісаў, што з'яўляецца перакананым нацыянал-сацыялістам. У каментарах ён перыядычна вітаўся нацысцкім прывітаннем, захапляўся ультраправай музыкай, называў Адольфа Гітлера «вялікім палітыкам і лепшым з людзей».
Невядома, наколькі ён усур'ёз гэта пісаў і ці змяніў свае погляды да гэтага часу, але асудзілі яго за гэтыя паведамленні. Тэлеграм-акаўнт Вячаслава цалкам адкрыты і знайсці іх было нескладана.
Вячаслава Міхалапа судзілі ў Магілёўскім абласным судзе паводле часткі 1 артыкула 130‑1 Крымінальнага кодэкса Беларусі — рэабілітацыя нацызма.
Яму прысудзілі хімію з накіраваннем і дадалі ў «спіс экстрэмістаў». Цяпер Вячаслаў адбывае пакаранне.
«Вясна» не лічыць яго палітвязнем, на сайце Дысідэнта яго імя стаіць з пазнакай «патэнцыйны пераслед».
«Наша Нiва» — бастыён беларушчыны
ПАДТРЫМАЦЬ
Каментары
Лукашэнка
Жрут с левацких рук гранты, вот и вся их правозащита.