У цэнтры Тбілісі пачаўся трэці вечар антыўрадавых пратэстаў, на якія гэтым разам сабраліся дзясяткі тысяч чалавек. Згоды на адкліканне законапраекта аб замежных агентах пратэстоўцы ўжо дамагліся, таксама патрабавалі вызвалення ўсіх затрыманых у папярэднія дні.
МУС Грузіі ўжо паведаміла, што ўсе затрыманыя за адміністрацыйныя парушэнні ўдзельнікі акцый пратэсту вызваленыя. Праўда, не ўдакладняецца, ці спыненыя супраць іх справы.
Акрамя таго, расследаванне крымінальных спраў, звязаных з гвалтам 7 і 8 сакавіка, працягваецца, паведамілі грузінскія сілавікі.
«Праводзяцца следчыя дзеянні па ўстанаўленні, апазнанні і затрыманні асоб, якія ўчынілі напады на супрацоўнікаў паліцыі і іншыя гвалтоўныя дзеянні на мітынгу пратэсту паблізу будынка парламента», — заявіла прэс-служба МУС.
Пленарнае пасяджэнне парламента Грузіі пройдзе заўтра, 10 сакавіка. Дэпутаты збяруцца, каб праваліць галасаванне па законапраекце аб «замежных агентах» у другім чытанні і гэтым зняць праблему, якая выклікала хвалю пратэстаў. Раней гаварылася, што гэта нібыта магчыма толькі пасля 20 сакавіка.
Тым часам мітынгоўцы выстаўляюць і новыя, ужо больш радыкальныя патрабаванні — сярод іх адстаўка ўрада.
Цяпер чытаюць
Мабільным аператарам забаранілі заганяць беларусаў у вялікі мінус8
Каментары