«Такія фільмы не выклікаюць нічога, акрамя смеху». Кізім пракаментаваў атаку на самалёт А-50 у Мачулішчах
У інтэрв’ю «Ліга.net» пасол Украіны ў Беларусі Ігар Кізім пракаментаваў дыверсію ў Мачулішчах і страх беларускіх улад перад беларускімі добраахвотнікамі.
Амбасадар Украіны гаворыць, што пакуль дэталі падзей у Мачулішчах невядомыя, трэба пачакаць некалькі дзён. Меркаваць пра падзею па прапагандысцкім фільме не варта. «Такія фільмы не выклікаюць нічога, акрамя смеху», — кажа ён.
«Гэта ўсё падаецца як дасягненне спецслужбаў. Яны павінны нешта рабіць, даказваць сваю карыснасць. Усё пабудавана на тым, што спецслужбы сёння маюць асноўны голас у беларускай палітыцы», — сказаў ён.
Кізім кажа, што дзіўная справа атрымоўваецца: расійскі самалёт быў пашкоджаны пры нападзе з тэрыторыі Беларусі. У Чыкагскай канвенцыі ваенныя паветраныя судны маюць прынцып экстэрытарыяльнасці — фактычна гэты самалёт зʼяўляецца тэрыторыяй Расіі, і з тэрыторыі Беларусі адбыўся напад на тэрыторыю Расіі. Калі карыстацца логікай беларускага кіраўніцтва, якое вінаваціць у дыверсіі ўкраінцаў, то ў тых ёсць на гэта права — гэта ўдар па Расіі.
На пытанне, ці ёсць насамрэч партызанскі рух у Беларусі, Кізім адказаў: «Апазіцыя і нейкія партызаны ёсць. Гэта праўда. Калі Лукашэнка даў даручэнне шукаць і караць усіх, то яны насамрэч ёсць».
Ён гаворыць, што беларускія добраахвотнікі, якія ваююць на баку Украіны, палохаюць беларускія ўлады.
«На 100% палохаюць. Лукашэнка неаднаразова казаў, што ўсё пра іх вядома, іх зловяць і пасадзяць. Што да падтрымкі ў грамадстве, то сказаць складана.
Ва ўмовах тэрору супраць насельніцтва людзям цяжка выказаць сваё меркаванне. Але ў зносінах са звычайнымі грамадзянамі Беларусі я адчуваю падтрымку Украіны. Яна негалосная», — гаворыць ён.
Чытайце таксама:
Пасол Украіны: Мы перапісваліся з Макеем, але ён не адказваў, а толькі ставіў «+»
Лукашэнка назваў Зяленскага «гнідай», а «Байпол» — «мудакамі»
Каментары