Сустаршыні партыі «Беларуская хрысціянская дэмакратыя» 9 лістапада падалі ў Міністэрства юстыцыі дакументы на рэгістрацыю партыі.
Як заявіў журналістам сустаршыня БХД Аляксей Шэін, у Мінюст было перададзена больш за тысячу подпісаў заснавальнікаў партыі. «Мы будзем патрабаваць адкрытага разгляду нашых дакументаў і дабівацца таго, каб адносіны да нас былі заснаваныя на законе. Але я не бачу падстаў для таго, каб Мінюст адмовіў нам у рэгістрацыі», — заявіў Шэін.
Ён таксама паведаміў, што 9 лістапада сустаршыні БХД звернуцца ў Генеральную пракуратуру. Гэты зварот звязаны з тым, што ўжо зараз аказваецца націск на людзей, якія паставілі свае подпісы ў якасці заснавальнікаў партыі. Сустаршыні БХД патрабуюць ад Генпракуратуры разабрацца ў гэтай сітуацыі і прыняць меры да спынення падобнай практыкі.
Як раней паведамляў адзін з сустаршыняў партыі Севярынец,
напярэдадні падачы дакументаў актывістцы БХД з Віцебска Дане Паповай тэлефанавалі з Міністэрства юстыцыі і цікавіліся, ці з’яўляецца яна заснавальніцай БХД,
ці ўдзельнічала яна ва ўстаноўчым з’ездзе партыі ці ў сходзе па вылучэнні дэлегатаў на з’езд, хто з’яўляецца кіраўніком віцебскай арганізацыі БХД.
Таксама, паводле слоў Севярынца, стваральнікі партыі зафіксавалі, што ў Пінску, Брэсце і Бабруйску з актывістамі БХД размаўлялі прадстаўнікі КДБ і патрабавалі ад іх адклікаць свае подпісы са спісу заснавальнікаў партыі.
Устаноўчы з’езд БХД прайшоў у Мінску 31 кастрычніка. У ім узялі ўдзел 311 дэлегатаў з усіх рэгіёнаў краіны і Мінска. Дэлегаты з’езда прынялі рашэнне аб юрыдычным стварэнні партыі, зацвердзілі яе статут і праграму, абралі кіраўніцтва. БХД узначалілі чатыры сустаршыні: Павел Севярынец, Аляксей Шэін, Віталь Рымашэўскі і Георгій Дзмітрук. Большасцю галасоў прынятыя рашэнні аб удзеле ў мясцовых выбарах 2010 года і ў прэзідэнцкіх выбарах 2011 года. Акрамя таго, партыя абвясціла аб пачатку агульнанацыянальнай кампаніі супраць казіно.
Гэта ўжо другая спроба зарэгістраваць партыю. Першы ўстаноўчы з’езд БХД адбыўся 28 лютага, аднак падчас яго склікання і правядзення Міністэрства юстыцыі ўгледзела парушэнні і не зарэгістравала партыю.
Каментары