Чарга на выезд — каля 50 гадзін, на ўезд — больш за 40. Якая сітуацыя на беларускіх межах з ЕС
Паглядзелі, што робіцца на асноўных пагранічных пунктах пропуску напярэдадні навагодніх святаў.
«Катлоўка». Сітуацыя на адным з самых папулярных у беларусаў напрамкаў застаецца крытычна складанай апошнія некалькі дзён. У чэргах стаяць сотні машын, рэйсавыя аўтобусы таксама прыходзяць з затрымкай. Па словах відавочцаў, прамаруджванне звязана з мерамі кантролю на беларускім баку:
«Вузкае месца — беларуская мытня, і менавіта на ёй ствараецца затор. І рэч не ў тым, што памежнікі працуюць марудна. Проста яны патрабуюць выгружаць рэчы з машын, што на «зялёным», што на «чырвоным» канале, і старанна глядзяць кожную сумку і кожны чамадан», — дзеліцца інфармацыяй адзін з кіроўцаў.
Так, каб апынуцца каля літоўскага «шлагбаума», легкавым аўтамабілям зараз патрэбна больш за 30 гадзін. Падрыхтавацца да доўгага стаяння давядзецца і тым, хто хоча вярнуцца ў Беларусь. Час чакання на ўезд у гэтым пункце — каля 40 гадзін.
«Каменны Лог». 23 снежня сярэдні час перасячэння літоўскай мяжы з гэтага напрамку складаў каля 30 гадзін, але пік затрымак прыйшоўся на наступны дзень — тады тэрмін чакання павялічыўся амаль удвая.
На вечар панядзелка сітуацыя па-ранейшаму застаецца напружанай: чарга з аўтамабіляў на выезд з краіны расцягнулася больш чым на тры кіламетры — машыны стаяць па 40 гадзін.
Пасажыры дзеляцца, што заторы — праз працу літоўскіх памежнікаў (беларускіх праходзяць хутка).
З-за доўгага прастою некаторым аўтамабілістам становіцца дрэнна. У чаце шукаюць гарачкапаніжальныя прэпараты і супрацьпрастудныя медыкаменты.
«Прывалка». Як нам давялося даведацца, сітуацыя на «Прывалцы» застаецца самай складанай. Па стане на вечар 25 снежня, чарга на гэтым пункце складала больш за 240 машын, а тэрмін чакання — больш за 50 гадзін.
Людзі шукаюць цёплую ежу і магчымасць прайсці мяжу хутчэй.
«Брэст». Сур'ёзныя затрымкі на польскім напрамку таксама пачаліся яшчэ 23 снежня — сярэдні час перасячэння мяжы на той момант складаў 45 гадзін. Напружаным заставаўся і наступны дзень — ахвотныя пакінуць Беларусь правялі ў чарзе каля 1,5 сутак. Каб паскорыць працу памежнікаў, некаторыя кіроўцы сталі сігналіць. Інфармацыі пра тое, ці паўплывала гэта на хуткасць руху транспарту, пакуль няма.
Сітуацыя крыху палепшала 25 снежня — час выезду з краіны скараціўся да 20 гадзін.
«Грыгароўшчына». Не стала выключэннем і мяжа з Латвіяй — яна таксама перагружана. Хаця справы на Грыгароўшчыне ідуць крыху лепш, чым на астатніх напрамках, у вечар панядзелка на выезд з Беларусі тут выстраілася 150 аўтамабіляў, а сярэдняя хуткасць праходжання складала каля 18 гадзін.
Вялізныя чэргі на мяжы ажывілі спекулянтаў: яны гатовы прадаць запаветнае месца побач з КПП. Цэны на такую паслугу адрозніваюцца ў залежнасці ад канкрэтнага пункта пропуску і вар'іруюцца ад 300 да 500 еўра.
Сітуацыя на межах мяняецца кожную гадзіну. Плануючы паездку ў бліжэйшыя дні, правярайце інфармацыю ў чатах аўтамабілістаў ці на гарачай лініі пагранкамітэта Беларусі.
Каментары