З Музычнага тэатра, дзе днямі праспявалі «Перамен!», збіраюцца звольніць дырэктара
На мінулым тыдні расійскі аркестр у Музычным тэатры ў Мінску сыграў кампазіцыю «Перамен!» гурта «Кіно», якой падпявала ўся зала. Выглядае, што за гэта можа страціць пасаду дырэктар тэатра Сяргей Пукіта, даведалася «Люстэрка».
Згодна з афішай Музычнага тэатра, 16 сакавіка там выступаў сімфанічны аркестр Варонежскага канцэртнай залы з праграмай «Анталогія рускага року», у рэпертуары якога як раз ёсць гэтая кампазіцыя гурта «Кіно».
Але тое, што адбылося, не спадабалася чыноўнікам, бо ў 2020 годзе гэта песня Віктара Цоя стала адным з неафіцыйных сімвалаў падзей жніўня, калі гукарэжысёры («дыджэі пераменаў») Кірыл Галанаў і Улад Сакалоўскі ўключылі яе 6 жніўня ля Кіеўскага сквера ў Мінску (там планаваўся мітынг у падтрымку Ціханоўскай, які ўлады адмянілі), пасля чаго былі арыштаваныя. Хлопцы пазней з'ехалі ў Літву.
Цяпер за гэтае «крамольнае» выкананне хочуць звольніць дырэктара тэатра Сяргея Пукіту. Паводле інфармацыі крыніцы «Люстэрка», заўтра, 21 сакавіка, у яго апошні працоўны дзень.
Работнікі тэатра збіраюцца пісаць калектыўны зварот з просьбай пакінуць цяперашняга кіраўніка на пасадзе, яны «ў цэлым характарызуюць яго як разумнага, сумленнага чалавека».
Журналістцы «Люстэрка» ў прыёмнай дырэктара адказалі, што Пукіта на месцы, але заняты, а пытанне, ці сапраўды яго збіраюцца звальняць, каментаваць адмовіліся. А вось ва ўпраўленні культуры Мінгарвыканкама сказалі больш:
«Мы ў курсе гэтай праблемы. Кіраўніцтва горада вырашае, як быць у гэтай сітуацыі. Цяпер пакуль яшчэ нічога не магу сказаць, але так, сапраўды, інцыдэнт быў. Як ён вырашыцца, пакуль не магу сказаць, — цяпер ідзе разгляд гэтага пытання. Ну, бачыце, адбылося так, як адбылося. Дзякуй Вам за вашы перажыванні», — адказала супрацоўніца ўпраўлення і дадала, што не ведае, калі рашэнне будзе прынята.
Сяргей Пукіта ўзначальвае Музычны тэатр з 2019 года. Ён нарадзіўся ў 1978-м, у 1998-м скончыў Магілёўскае вучылішча культуры, у 2003-м — сталічны Універсітэт культуры (майстэрня Мадэста Абрамава). З 2004 года працаваў у сталічным Маладзёжным тэатры (з 2010-га быў намеснікам дырэктара), а таксама актыўна здымаўся ў кіно, праўда, часцей за ўсё ў эпізодах, але ў даволі вядомых фільмах: «Стылягі», «Каменская-5», «Дзяржаўная мяжа» і іншых.
Каментары
Звальняйце расійскі аркестр, які граў песню.
Прад'яўляйце свае прэтэнзіі сімфанічнаму аркестру Варонежскай канцэртнай залы.