Чыноўнікі прыдумалі незвычайны спосаб утрымаць школьнікаў ад паступлення за мяжу
Не можаш заахвоціць паступаць у беларускія ВНУ — ствары бюракратычныя перашкоды перад выездам з краіны.
Ідэалагізацыя адукацыі, рэпрэсіі супраць педагогаў і ўчарашняя метадалогія выкладання кожны год штурхаюць беларускіх школьнікаў і іх бацькоў у бок атрымання адукацыі на Захадзе.
Першым крокам да таго, каб паступіць за мяжу, беларускаму выпускніку трэба апастыляваць свой атэстат у Міністэрстве адукацыі, адстаяўшы доўгую чаргу разам з іншымі ахвотнымі і заплаціўшы 5 базавых (200 рублёў) за дакумент.
Разумеючы праблему адтоку дзяцей, лукашэнкаўцы ўспомнілі старыя правераныя бюракратычныя метады.
На гэты момант чарга на апастыляванне складае роўна месяц — калі сёння запісацца на падачу, то можна трапіць у Міністэства адукацыі на атрыманне апастыля толькі 5 жніўня.
Але часам чыноўніцкія мазгі нараджаюць па-сапраўднаму крэатыўныя бар'еры.
Як стала вядома «Нашай Ніве» ад настаўнікаў, а таксама некалькіх суразмоўцаў, чые знаёмыя з гэтым сутыкнуліся, улады вынайшлі яшчэ адзін спосаб стрымаць абітурыентаў.
«У атэстат наўмысна ставіцца памылка ў прозвішчы дырэктара ці завуча. Умоўна, была Лукашэнка, стала Лукташэнка. Або змазваецца подпіс. Школьнік прыходзіць у Мінадукацыі, яму кажуць, што такі дакумент апастыляваць не могуць — бо ў дырэктара іншае прозвішча або іншы подпіс. Таму, маўляў, атрымлівайце па-новаму і вяртайцеся. Выпускнік кідаецца ў школу — а патрэбны чалавек у адпачынку. Або проста пераробліванне і чарга ў Міністэрства адукацыі займае столькі часу, што на падачу ва ўніверсітэт за мяжу школьнік ужо не паспявае. У гэтым і сэнс. Што рабіць? Паступаць у Беларусі. У беларускіх ВНУ на сапраўднасць подпісу і памылкі ў прозвішчах увагі не звяртаюць», — тлумачыць наш суразмоўца з сістэмы адукацыі.
Прынцып, па якім абіраюцца школьнікі з нібыта выпадковымі «памылкамі» ў атэстаце, невядомы.
Мы ведаем пра такія выпадкі пераважна ў школах з традыцыйна высокім працэнтам паступленняў за мяжу.
Але некаторыя людзі, якія з гэтым сутыкнуліся, робяць выснову, што лепш было б іх дзецям маўчаць аб намеры паступаць за мяжу і не казаць гэтага нікому са школьных настаўнікаў. Яны падазраюць, што ім у атэстаце памылку зрабілі наўмысна, таму што ў школе ведалі, што дзіця збіраецца з'язджаць.
Настаўнікі пацвярджаюць «Нашай Ніве», што начальства запытвае інфармацыю ў класных кіраўнікоў аб тым, ці вядома ім аб планах вучняў паступаць за мяжу.
Настаўнікам настойліва прапануюць стрымліваць дзяцей і агітаваць іх застацца ў Беларусі.
Каментары