Дэкларацыя саміту НАТА: Украіне паабяцалі «незваротны шлях» у альянс. Узгадалі і Беларусь
Краіны НАТА паабяцалі Украіне 40 мільярдаў еўра дапамогі ў 2025 годзе. Пра гэта гаворыцца ў дэкларацыі саміту Паўночнаатлантычнага альянсу.
У дакуменце пацвярджаецца «незваротны шлях да поўнай еўраатлантычнай інтэграцыі Украіны, якая ўключае ў сябе сяброўства ў НАТА». Удзельнікі альянсу адзначаюць, што накіруюць Кіеву запрашэнне аб далучэнні, «калі ўсе хаўруснікі пагодзяцца на гэта і ўсе ўмовы будуць выкананыя». На бліжэйшы год саюзнікі маюць намер выдаткаваць мінімум 40 млрд еўра. Гэтыя грошы будуць накіроўвацца на абаронныя патрэбы Украіны.
Акрамя гэтага, прынята рашэнне стварыць Службу дапамогі і навучання ў галіне бяспекі для Украіны (NSATU), якая будзе займацца каардынацыяй паставак ваеннай тэхнікі і падрыхтоўкай асабістага складу.
Расія ў дэкларацыі саміту НАТА называецца «самай значнай і наўпроставай пагрозай бяспецы» альянсу.
Таксама пагрозай альянсу НАТА назвала паглыбленне адносін Беларусі і Расіі. «Беларусь працягвае садзейнічаць вайне з Украінай, даючы сваю тэрыторыю і інфраструктуру. Паглыбленне палітычнай і ваеннай інтэграцыі Расіі ў Беларусь, уключаючы разгортванне перадавога расійскага ваеннага патэнцыялу і асабовага складу, мае негатыўныя наступствы для рэгіянальнай стабільнасці і абароны альянсу», — гаворыцца ў дэкларацыі.
Лідары НАТА заявілі пра безадказную ядзерную рыторыку Расіі і назвалі шантажом сігналы, якія дасылае Масква, сярод іх — размяшчэнне ядзернай зброі ў Беларусі. Паводле НАТА, такім чынам Масква займае пазіцыю стратэгічнага запалохвання.
Акрамя Беларусі, у заяве таксама называюцца тры краіны, якія садзейнічаюць расійскай агрэсіі супраць Украіны: Іран, Паўночная Карэя і Кітай.
Пра Кітай гаворыцца, што ён аказвае «вырашальную» падтрымку расійскай абаронна-прамысловай базе.
«Заклікаем КНР як пастаяннага члена Савета Бяспекі ААН спыніць усякую матэрыяльную і палітычную падтрымку ваенных намаганняў Расіі. Гэта ўключае і перадачу матэрыялаў падвойнага прызначэння, такіх як кампаненты зброі, абсталявання і сыравіны, якія выкарыстоўваюцца ў якасці фактараў вытворчасці расійскага абароннага сектара. КНР не можа падсілкоўваць найбуйнейшую вайну ў Еўропе ў найноўшай гісторыі без негатыўнага ўплыву на свае інтарэсы і рэпутацыю».
Пачаўся працэс перадачы знішчальнікаў F-16 Украіне — першыя самалёты ўжо на шляху ў краіну
«Дзядзька Андрэй, спыніся». Пляменніца міністра абароны Расіі, якая жыве ў ЗША, звярнулася да яго пасля атакі на Кіеў
Новы ўрад Вялікабрытаніі дазволіў выкарыстоўваць брытанскія ракеты Storm Shadow для ўдараў па Расіі
Каментары