Невядомыя скралі элемент помніка ўсходнеславянскаму першадрукару.
Помнік Францішку Скарыну пастаўлены ў пражскіх Градчанах у 1996 годзе, яго аўтары — скульптар Эдуард Астаф'еў і архітэктар Юрый Казакоў. Першадрукар у левай руцэ трымае кнігу, а ў правай — пяро. Цяпер жа пяра няма, яго скраў невядомы.
Гэта не першы выпадак, калі невядомыя пашкоджваюць помнік Скарыне. Раней паліцыя зламыснікаў не знаходзіла, манумент аднаўляўся сіламі беларускіх актывістаў, піша «Свабода».
Актывіст Віталь Цімашэнка распавёў, што пяро знікае не ўпершыню.
«Мы яго аднаўлялі некалькі разоў. Спачатку аднавілі ў Беларусі па аўтарскай форме, мы з братам яго вярнулі. Пазней шыльду адрывалі, таксама прыйшлося аднаўляць. Яшчэ раз з сябрам аднаўлялі пяро сем гадоў таму, тады вырашылі зрабіць пяро з цвёрдага пластыка, а не металу. Прычым вырабілі некалькі пёраў, з запасам.
Трэба будзе пашукаць, дзе гэта запасное пяро. Але будзем аднаўляць. Паліцыя папярэднія разы не знаходзіла вінаватага. Адбываецца гэта ноччу, няма ніякіх відэакамер, паліцыянты проста складалі пратакол і не знаходзілі вінаватых», — распавёў Віталь.
Актывісты гэтым разам вырашылі не звяртацца ў паліцыю, а аднаўляць помнік самастойна. Яны лічаць, што гэта, хутчэй за ўсё, правакацыя ці хуліганства. Магчыма, пяро скралі нейкія валацугі — думалі, што яно з металу.
Цяпер чытаюць
35 маладых беларусаў і беларусак, за якімі варта сачыць: апублікаваны першы спіс Next 3524
Каментары