Стаў бацькам падчас Алімпіяды. Хто такі Яўген Залаты — наша надзея ў веславанні
3 жніўня ў 11:30 па беларускім часе вясляр Яўген Залаты пазмагаецца за алімпійскае золата — 24-гадовы атлет прабіўся ў фінал спаборніцтваў на 2000 метраў. Што за спартовец можа прынесці Беларусі трэці медаль парыжскіх Гульняў?
Залаты родам з Краснаполля — мястэчка на 5500 чалавек, што ў Магілёўскай вобласці. Каб стаць прафесійным спартоўцам, яму давялося з’ехаць у Магілёў, дзе хлопец стаў займацца ў абласным цэнтры алімпійскага рэзерву па водных відах спорту.
Яўген пачынаў спаборнічаць у экіпажах: напрыклад, у 2017-м ён прывёз з юніёрскага чэмпіянату свету срэбра за выступ у парнай двойцы. Але ў 2021-м, на чэмпіянаце свету сярод моладзі, Залаты ўжо спаборнічаў у адзіночным фармаце, і тады хлопец стаў пятым.
Сёлета Яўген ужо браў медаль, гэта была бронза этапа Кубка свету па веславанні на той жа самай дыстанцыі 2000 метраў, дзе беларус паспаборнічае ў суботу. На чэмпіянаце свету — 2023 Залаты быў сёмым, і гэтага хапіла, каб узяць алімпійскую ліцэнзію.
Зрэшты, ён мог і не паехаць на Алімпіяду: Яўген — сябра спартовага камітэта беларускіх Узброеных сіл, і некаторых беларускіх атлетаў праз гэта не дапусцілі да Гульняў. Але Залатому, як і шэрагу іншых беларусаў, гэта не перашкодзіла трапіць у Парыж.
На Гульнях, аднак, у нашых весляроў узнікла праблема з інвентаром. Зборная планавала прыехаць на Алімпіяду са сваімі лодкамі, але ж на мяжы ім забаранілі гэта рабіць. Давялося арандаваць лодкі за мяжой, і не адразу атрымалася гэта зрабіць — нямецкая кампанія з-за санкцый адмовілася даваць лодку ў арэнду. Але ў выніку задачу вырашылі, і выглядае, што Залаты, у адрозненне ад партнёркі па камандзе Таццяны Клімовіч, здолеў прыстасавацца да новай лодкі.
У 2020-м Яўген ажаніўся на былой вяслярцы Ксеніі, і на днях ён стаў бацькам. 30 ліпеня, за дзве гадзіны да чвэрцьфінальнага алімпійскага заезду, у весляра нарадзіўся сын Марк. Яўгену сказалі пра навіну толькі пасля заезду, каб не перашкаджаць яму перад важнай падзеяй.
«Наша Нiва» — бастыён беларушчыны
ПАДТРЫМАЦЬХто той палітвязень з Іванава, які выплаціў $600 тысяч кампенсацыі за данаты і ўсё адно атрымаў вялікі тэрмін?5
Хто той палітвязень з Іванава, які выплаціў $600 тысяч кампенсацыі за данаты і ўсё адно атрымаў вялікі тэрмін?
«На працягу 30 гадоў незалежнасці беларускамоўныя бюлетэні задавальнялі ўсіх». Камуністы абвінавацілі Бондараву ў распальванні варожасці на моўнай глебе1616
Каментары