У Брэсце мужчына падумаў, што яму атруцілі каву, і ўдарыў афіцыянтку лыжкай. Завялі крымінальную справу
Канфлікт здарыўся зусім нядаўна — 13 лістапада.
Мужчына пенсійнага ўзросту чамусьці вырашыў, што яго хочуць атруціць, і зладзіў бойку з афіцыянткай, піша Onliner.by.
У адной з берасцейскіх кавярняў кампанія адзначала юбілей. Пасля таго як афіцыйная частка скончылася і частка гасцей разышліся, 65-гадовы мужчына падышоў да барнай стойкі і замовіў сабе кавы.
— Пенсіянер, які знаходзіўся ў стане алкагольнага ап'янення, прад'явіў прэтэнзію 19-гадовай афіцыянтцы ў тым, што кава атручаная.
І настойваў, каб яна зрабіла першы глыток, так бы мовіць, прадэгуставала каву.
Натуральна, работніца адмовілася. Мужчына яшчэ каля хвіліны пастаяў, а потым схапіў чайную лыжку, якая ляжала на барнай стойцы, і ўдарыў дзяўчыну зваротным бокам у грудзі, — распавёў афіцыйны прадстаўнік СК і падкрэсліў: такі ўдар цалкам мог скончыцца цяжкай траўмай.
На дапамогу прыбегла 20-гадовая адміністратарка, якая закрыла сабой пацярпелую. Тады мужчына і яе ўдарыў лыжкай у грудзі.
Жонка пенсіянера, убачыўшы канфліктную сітуацыю, падышла да мужа і вывела яго з кафэ.
Тым часам афіцыянтка націснула трывожную кнопку, прыехалі супрацоўнікі міліцыі і ў той жа дзень жыхара Берасця затрымалі. Цяпер у дачыненні да яго распачатая крымінальная справа паводле ч. 3 арт. 339 (асабліва злоснае хуліганства).
Каментары