ХАМАС перадаcць целы чатырох закладнікаў. Сярод іх — рудавалосыя малыя браты Бібасы, якія сталі ў Ізраілі сімвалам трагедыі 7 кастрычніка

У чацвер ХАМАС перадасць Ізраілю целы чатырох закладнікаў у рамках пагаднення паміж бакамі. Паводле звестак баевікоў, сярод іх рудавалосыя хлопчыкі Арыэль і Кфір Бібас, якія сталі сімвалам трагедыі 7 кастрычніка ў Ізраілі, а таксама іх маці Шыры, піша Бі-бі-сі.

Ізраіль пакуль афіцыйна не пацвердзіў смерць дзяцей.

На момант выкрадання Кфіру Бібасу было каля 10 месяцаў. 35-гадовы Ярдэн Бібас, якога выкралі з кібуца Нір-Оз разам з жонкай Шыры і двума дзецьмі, быў вызвалены адзін 1 лютага.

У гэтую суботу баевікі ХАМАС таксама перададуць Ізраілю шасцярых закладнікаў у абмен на асуджаных у Ізраілі жыхароў Газы, а таксама целы яшчэ чатырох загінулых на наступным тыдні.

Інфармацыю аб перадачы цел закладнікаў у чацвер пацвердзіў офіс прэм’ер-міністра Біньяміна Нетаньяху, але не назваў імёнаў загінулых.

Адзінае імя са спісу першага этапу, смерць якога пацвердзіў Ізраіль, — Шлома Манцур.

Родныя Шыры, Арыэля і Кфіра Бібаса выказалі сумневы наконт заявы ХАМАС аб перадачы іх цел. Сям’я пакуль не атрымала афіцыйнага пацверджання ад уладаў Ізраіля.

У аўторак газета ХАМАС «Аль-Хайя» паведаміла, што сярод чатырох цел, якія перададуць у чацвер, ёсць члены сям’і Бібас.

«Пакуль мы не атрымаем канчатковага пацверджання, наш шлях не завершаны», — падкрэслілі члены сям’і.

У Ізраілі выкраданне сям’і Бібас баевікамі ХАМАС стала сімвалам трагедыі 7 кастрычніка. У кампаніі за іх вызваленне выкарыстоўваліся аранжавыя паветраныя шары, што сімвалізуюць рыжавалосых хлопчыкаў, а таксама спасылкі на Бэтмена, якога любіў чатырохгадовы Арыэль.

«Мы ўсё яшчэ трымаемся за надзею, — сказаў адзін з сваякоў сям’і ў радыёінтэрв’ю на гэтым тыдні. — Мы спадзяёмся на слёзы радасці, а не на слёзы смутку».

Пры нападзе ХАМАС загінулі і пажылыя бацькі Шыры Бібас.

15 лютага яшчэ трох ізраільскіх закладнікаў перадалi супрацоўнікам Міжнароднага Чырвонага Крыжа ў Хан-Юнісе на поўдні сектара Газа.

ХАМАС «гатовы» вызваліць адразу ўсіх закладнікаў у рамках другога этапу пагаднення

На гэтым тыдні ХАМАС заявіў, што гатовы вызваліць адразу ўсіх закладнікаў у рамках другога этапу пагаднення аб спыненні агню з Ізраілем, а не групамі, як гэта адбываецца цяпер.

Прэс-сакратар ХАМАС Хазэм Касэм падкрэсліў, што рэалізацыя гэтага плана залежыць ад поўнага вываду ізраільскіх войскаў з Газы і дасягнення пагаднення аб канчатковым спыненні вайны.

Міністр замежных спраў Ізраіля Гідэон Саар заявіў, што адкладзеныя перамовы па другой фазе пачнуцца на гэтым тыдні, і націскаў на тое, што Ізраіль пагодзіцца толькі на поўную дэмілітарызацыю Газы.

У сваім адказе ХАМАС назваў гэтае патрабаванне непрымальным.

Па стане на 15 лютага, у Газе ўсё яшчэ ўтрымліваюцца 70 з 251 закладніка, уключаючы целы не менш за 34 чалавек, чыя смерць пацверджана ізраільскай арміяй (ЦАХАЛ), піша The Times of Israel.

Усяго Ізраіль паведаміў, што вызваліць да 1904 палестынскіх зняволеных у абмен на 33 ізраільскіх закладнікаў у рамках першага этапу пагаднення.

• 0
• 0
• 0
• 0
• 0
• 11
• 1
• 0