«Прывязалі люкі і скінулі ў раку». Раскрылі забойства, якое адбылося ў 2001 годзе ў Брэсце

Следчыя раскрылі забойства, здзейсненае ў 2001 годзе ў Брэсце: банда збіла мужчыну, пасля чаго прывязала да яго люкі і скінула ў раку, паведамляе СК.

Восенню 2002 года дзеці лавілі рыбу на беразе Мухаўца і заўважылі раскладзеныя парэшткі чалавека. Аператыўнікі вызначылі, што смерць мела крымінальны характар. Ногі нябожчыка былі звязаныя, а на дне ракі вадалазы знайшлі тры каналізацыйныя люкі, сцягнутыя шнуром, і чалавечыя парэшткі. На той момант гэта было ўсё — цела доўгія гады заставалася неапазнаным, а справа нераскрытай. Але нядаўна ў гэтай гісторыі паставілі кропку.

У Галоўнае ўпраўленне па барацьбе з арганізаванай злачыннасцю і карупцыяй МУС паступіла інфармацыя, што да злачынства могуць быць датычныя чацвёра мужчын. Адзін знаходзіўся ў вышуку за махлярства, другі быў на волі, а яшчэ двое ўжо сядзелі за кратамі. Гэтыя трое пачалі даваць прызнальныя паказанні.

«У 2001 годзе з Гомеля ў Брэст прыехалі «гастралёры» для здзяйснення кватэрных крадзяжоў: двое маладых хлопцаў і 17-гадовая дзяўчына.

Яны сустрэліся з двума мясцовымі, адзін з якіх заявіў, што такі від дзейнасці не прынясе вялікага «заробку». Ён прапанаваў «гасцям» далучыцца да злачыннага бізнэсу і заняцца «шэрым рыэлтарствам», якое прадугледжвала завалоданне жыллём асацыяльных грамадзян.

Адначасова з гэтым 26-гадовы берасцеец паведаміў, што неабходна ліквідаваць канкурэнта па «бізнэсе». У выніку ўсе змоўшчыкі пагадзіліся», — піша Следчы камітэт.

Сустрэўшыся з канкурэнтам, яны яго збілі, некалькі разоў ударыўшы металічнай трубой. Потым зацягнулі яго ў машыну, нацягнулі на галаву вязаную шапку і адвезлі на пустку да чыгуначнага моста праз Мухавец.

Там мужчыну працягвалі збіваць, а пасля прывязалі да яго каналізацыйныя люкі і яшчэ жывога скінулі з моста. Адзін з удзельнікаў групы назіраў за тым, што адбываецца, збоку — ён адмовіўся збіваць чалавека і вярнуўся ў машыну.

«Па крымінальнай справе праведзены агляды месцаў злачынстваў, дапытаныя абвінавачаныя, з імі праведзены вочныя стаўкі і праверкі паказанняў на месцы. Фігуранты вылучалі абарончую версію, якая была абвергнутая сабранымі доказамі. У выніку была вызначана роля кожнага з іх у здзяйсненні злачынства», — перадае Следчы камітэт.

Супрацоўнікам МУС таксама ўдалося ўсталяваць асобу загінулага — на момант смерці яму было 30 гадоў — і знайсці яго сястру.

Акрамя таго, падчас расследавання было раскрыта ўзброенае нападзенне, у якім удзельнічалі абвінавачаныя.

У выніку на ўсіх членаў банды заведзены крымінальныя справы па некалькіх артыкулах: выкраданне чалавека; забойства, здзейсненае групай асоб; разбой, здзейснены з пранікненнем у жыллё, групай асоб, з мэтай завалодання маёмасцю ў асабліва буйным памеры.

Арганізатар абвешчаны ў вышук. Дзяўчына, якая ўдзельнічала ў злачынствах, памерла ў 2022 годзе.

• 2
• 1
• 0
• 0
• 1
• 0
• 2
• 0