Малдова абвясціла персонамі нон грата трох супрацоўнікаў расійскага пасольства
Улады Малдовы 31 сакавіка абвясцілі трох супрацоўнікаў расійскага пасольства ў Кішынёве персонамі нон грата. Пра гэта гаворыцца ў паведамленні малдаўскага Міністэрства замежных спраў.
«Рашэнне малдаўскіх уладаў грунтуецца на дакладных доказах дзейнасці, якая супярэчыць дыпламатычнаму статусу на тэрыторыі Рэспублікі Малдова. Дыпламаты павінны пакінуць краіну», — гаворыцца ў паведамленні.
Прычын высылкі супрацоўнікаў расійскага дыппрадстаўніцтва ў МЗС Малдовы не ўдакладнілі. Расійскае МЗС заявіла, што на такія дзеянні Кішынёва будзе «адказ».
Напярэдадні мясцовае выданне NewsMaker са спасылкай на малдаўскую Службу бяспекі і інфармацыі паведамляла, што малдаўскі дэпутат Аляксандр Несцяроўскі, якога прысудзілі да 12 гадоў пазбаўлення волі па справе аб незаконным фінансаванні прарасійскай партыі «Шор», пры дапамозе расійскіх дыпламатаў апынуўся на тэрыторыі непрызнанага Прыднястроўя.
Каментары