Зяленскі расказаў, як палёты невядомых дронаў у краінах ЕС адбіваюцца на вайне ва Украіне
Прэзідэнт Украіны Уладзімір Зяленскі ў інтэрв'ю Bloomberg заявіў, што ўварванні дронаў і знішчальнікаў у паветраную прастору ЕС — гэта мэтанакіраваная кампанія Уладзіміра Пуціна па запалохванні Еўропы.
Праз гэта, па словах Зяленскага, еўрапейскія лідары сталі менш ахвотна адпраўляць сістэмы супрацьпаветранай абароны Украіне.
«Я думаю, ён напалохаў іх, гэта была яго мэта, і ён яе дасягнуў, — сказаў прэзідэнт Украіны. — Гэта, без сумневу, быў псіхалагічны ціск».
З пачатку восені ў паветранай прасторы еўрапейскіх краін з'яўляюцца невядомыя дроны, з-за якіх нават спыняюць працу аэрапорты.
У інтэрв'ю Зяленскі таксама паведаміў, што Украіна пачала вытворчасць беспілотнікаў сумесна з ЗША, і што Кіеву неабходна фінансавая падтрымка ад саюзнікаў за кошт замарожаных расійскіх актываў. Але Еўропа пакуль не можа прыйсці да кансэнсусу па гэтым пытанні.
Каментары