Памятныя медалі ўручыў Прэзідэнт Ізраіля Шымон Перэс беларускай дэлегацыі праведнікаў народаў свету ў час іх першага афіцыйнага візіту ў Ізраіль.
Памятныя медалі ўручыў Прэзідэнт Ізраіля Шымон Перэс беларускай дэлегацыі праведнікаў народаў свету ў час іх першага афіцыйнага візіту ў Ізраіль. Аб гэтым расказалі ўдзельнікі паездкі на сустрэчы ў Мінскім яўрэйскім абшчынным доме.
Цэнтральнай падзеяй паездкі стаў урачысты прыём для беларускай дэлегацыі ў рэзідэнцыі Прэзідэнта ў Іерусаліме. Уручаючы ўзнагароды, Шымон Перэс, ураджэнец вёскі Вішнева Валожынскага раёна Мінскай вобласці, шчыра падзякаваў людзям, якія ратавалі яўрэяў у гады Вялікай Айчыннай вайны, рызыкуючы ўласным жыццём.
Беларуская група праведнікаў (дзевяць чалавек) і іх родных наведала Ізраіль 20‑25 чэрвеня. Візіт быў прымеркаваны да 65‑годдзя Вялікай Перамогі і арганізаваны Міністэрствам замежных спраў Ізраіля пры садзейнічанні пасольства Ізраіля ў Беларусі. За чатыры дні знаходжання ў Ізраілі члены дэлегацыі не толькі сустрэліся з кіраўніком дзяржавы, але і наведалі мемарыяльны комплекс «Яд Вашэм» у Іерусаліме, зрабілі экскурсіі па Іерусаліму і Тэль‑Авіву, з’ездзілі на Мёртвае мора і пабывалі ў Кнесеце (парламенце), дзе сустрэліся з дэпутатамі.
Ганаровае званне Праведнік народаў свету прысвойваецца ў Ізраілі прадстаўнікам іншых народаў, якія ў перыяд халакосту ратавалі або садзейнічалі ратаванню яўрэяў. У гонар кожнага праведніка на алеі ў Іерусаліме саджаецца дрэва. У Беларусі званне Праведнік народаў свету прысвоена амаль 700 жыхарам.
Цяпер чытаюць
Што цяпер з італьянскімі візамі? Масавыя адмовы? Турфірмы называюць альтэрнатыву6
Што цяпер з італьянскімі візамі? Масавыя адмовы? Турфірмы называюць альтэрнатыву
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары